- Publika iha: 13 Junho 2013
Membru Parlamentu Nasional sujere ba Ministeriu Transportes no Telekomunikasaun hodi loke edifisiu korreius iha distritu hotu, atu nune’e komunidade sira iha distritus mos bele asesu ba korreius,liu-liu bainhira atu haruka dokumentus ruma mai iha nasional.
Deputada Maria Fernanda Lay hateten,edifisiu korreius(Post Office) importante tebes tanba atu haruka dokumentus importante ruma ba iha distritu tenke iha edifisiu korreius ne’ebe permanente.
“Hau iha momentu ida presiza haruka dokumentus ba iha Dioceze Maliana no Dioceze Baucau maibe la konsege haruka, ne’ebe hau hanoin ita presiza kantor pos,” preokupa Deputada Lay, foin lalais, iha Parlamentu Nasional.
Tanba ne’e nia husu ba governu atu harii lalais edifisiu korreius iha distritu sira, nune’e bainhira haruka surat importante ruma, la presiza fo tuir ema maibe liu husi korreius deit.
“Porque haruka tuir deit bis hau la garantia to’o iha ne’eba ga la’e, durante ne’e ita iha Dili deit maibe atu sai ba nasaun liur,” tenik Deputada Lay.
Nia hatutan, servisu postais la’os foin mak atu harii maibe postais iha tempu Portugues no Indonezia kedas, distritu sira mos iha hotu.
Hatan ba preokupasaun ne’e,Ministru Transportes no Telekomunikasaun, Pedro Lay rekonhese katak,durante ne’e dokumentus importantes sira fo tuir deit bis.
“Mais edifisiu Correios importante tebes para hodi hato’o karta ba iha fatin-fatin iha Timor laran tomak,” tenik Ministru Lay.