Sexta, Março 01, 2024
Total visitors: 766366

Xefe Sentru Saude Quelecai iha Postu Administrativu Quelecai, Munisípiu Baucau, Salomão Salustiano Gama hateten sira enfrenta hela problema bee moos, tanba bee laiha, obrigadu dalaruma pasiente, liu-liu inan isin-rua sira tenke lori bee husi uma.

Xefe Sentru Saude Quelecai iha Postu Administrativu Quelecai, Munisípiu Baucau, Salomão Salustiano Gama hateten sira enfrenta hela problema bee moos.

Nia dehan instalasaun tornera iha, maibé tempu bailoron naruk ne'e bee mak laiha duni, tanba ne'e kuaze fasilidade saúde hotu bee laiha.

"Pasiente sira baixa iha ne'e, liu-liu inan isin-rua sira partu ita bele kuru bee no liga bee husi viziñu sira atu uza. No foin lalais ami koordena ho saúde munisípiu depois hola bee tanki mak ense," nia hateten bainhira partisipa iha atividade orientasaun kampañia Integradu Promosaun no Edukasaun Saúde, iha sentru saúde Quelecai, Baucau.

Nia hateten nesesidade seluk mak transporte atu transporta pasiente husi komunidade mai sentru saude no husi sentru mai Hospital Regional Baucau, tanba iha de’it karreta multifunsaun ida, ne’ebé lasufisiente responde ba komunidade iha área remota sira.

"Área luan komunidade hela iha foho leten, mota sorin ho de’it kareta multifunsaun ida, dalaruma pasiente nain tolu moras dala ida balun aluga karreta tula, komunidade hulan de’it, udan bo'ot mota tun komunidade hulan de’it moras," nia akresenta.

Nia hatutan postu Quelecai iha suku hamutuk 15 no aldeia 59. Postu ne'e iha sentru saude ida, postu saúde neen, maibé postu saude rua mak médiku laiha mak postu Lema no Bualale.

Alende ne’e nia dehan, postu Quelecai seidauk iha uma maternidade, maibé sira didin de’it kuartu ida hodi fó atendimentu partu ba inan isin-rua sira.

Entretantu Xefe Suku Bualale, Gabriela Belo da Conceição hateten kuaze komunidade suku hotu iha postu Quelecai enfrenta problema hanesan menus bee no laiha asesu ba bee.

"Ami rona pesoal sira kuru no liga bee husi uma mak mai uza no pasiente sira ne’ebé mai sira lori bee husi uma mak mai uza iha ne'e, ida-ne'e mak ami-nia preokulasaun hodi hato'o ba nai ulun sira iha leten," nia hato'o.

Iha fatin hanesan, Xefe Suku Bagia hateten komunidade suku refere 75% difisil asesu ba bee, liu-liu aldeia Laua-Liu no Saraida.

"Agora dadaun komunidade enfrenta problema bee moos no menus aihan, tanba loloos udan mai iha fulan-novembru, maibé agora fulan-dezembru ona seidauk udan. Komunidade araska ba bee no aihan impaktu husi mudansa klimátika ne’ebé akontese iha ita-nia rai," nia hateten.

Nia informa totál populasaun iha suku Baguia postu administrativu Quelecai hamutuk 1,549.