Sexta, Março 01, 2024
Total visitors: 766366

Administrador Munisípiu Manufahi, Arantes Isaac Sarmento hateten irigasaun bo’ot Karau Ulun Betano, ne’ebé hetan estragus husi akontesimentu inundasaun udan bo’ot iha hira ba kotuk, governu seidauk halo manutensaun, tanba ne’e labele fornese bee ba natar kuaze 650 hektares.

Administrador Munisípiu Manufahi, Arantes Isaac Sarmento hateten irigasaun bo’ot Karau Ulun Betano, ne’ebé hetan estragus husi akontesimentu inundasaun udan bo’ot iha hira ba kotuk, governu seidauk halo manutensaun.

Nia dehan iha situasaun agora bailoron naruk rezulta fonte bee barak mak kuantidade menus inklui fonte bee mai husi foho Kablaki mós menus.

“Setór agrikultura iha Manufahi, liu-liu Betano irigasaun Karau Ulun ne’e bo’ot to’o agora paradu hela kondisaun aat. Maibé Ministériu iha ona planu atu halo rehabilitasaun atu fornese bee ba agrikultór sira halo natar,” nia hateten hafoin partisipa iha enkontru revitalizasaun no aprovasaun suku pilotu ba programa KONSSANTIL nian iha salaun City 8 Manleuana, Díli.

Nia hateten governu lokal ho parseru sira halo ona enkontru kona-ba asaun proprio ne’ebé tenke halo hodi responde ba situasaun mudansa klimátika, tanba kestaun ne’ebé komunidade hahu enfrenta mak menus bee.

Nia hatutan asaun konkretu ne’ebé governu lokal halo mak halo sensibilizasaun ba komunidade atu proteje no konserva bee matan sira, liu-liu labele tesi ai no sunu rai arbiru.

Administradór enkoraja entidade hotu-hotu no komunidade atu kuidadu bee matan sira no halo jestaun diak hodi fornese ba komunidade ba konsumu no utiliza ba atividade agrikultura nian, liu-liu kuda modo, hakiak animal no hakiak ikan.

Iha parte seluk, Ministru Agrikultura, Pecuária, Pesca no Floresta (MAPPF), Marcos da Cruz hateten ekipa halo hela levantamentu ba rekursu bee iha fatin hotu-hotu, atu fatin sira ne’ebé iha bee tenke proteje no jere ho didiak hodi fornese ba agrikultor sira kuda aihoris sira ne’ebé la presiza bee barak.

“Bailoron área barak bee laiha maibé mota balun bee sei iha, entaun ami sei buka hatene atu fasilita sira prodús nafatin iha fatin sira ne’ebé bee iha. Hanesan iha Karabela rai abandona, iha semana liuba ita fasilita escavador kee bee mota iha sorin kuaze 4 km,” nia hateten.

Nia hateten irigasaun barak ne’ebé presiza halo manutensaun, tanba ne’e governu sei haree ida ne’e hodi fornese bee ba agrikultór sira tanba governu foku ba hasa’e produsaun hare, animal no ikan.

Nia hatutan asaun importante ne’ebé halo mak konsensializa povu atu labele tesi ai, liu-liu area sira bee matan iha tanba kuandu tesi ai arbiru, bee menus.

Nia enkoraja agrikultór sira atu utiliza bee oituan ne’ebé iha ho diak no proteje bee matan sira ne’ebé iha liuhusi kuda ai oan barak.