- Publika iha: 19 Dezembro 2023
Diretór Jerál, Servisu Nasionál Ambulánsia Emerjénsia no Medika (SNAEM, IP), Horacio Sarmento informa totál karreta ambulánsia hamutuk 55, maibé 25 de’it mak kondisaun di’ak halo movimentu tula pasiente ba ospitál hodi hetan atendimentu saúde.
Nia dehan ambulánsia kuaze 18 mak entrega ona ba iha Patrimóniu Estadu, tanba kondisaun aat totalmente, difisil atu hetan ekipamentu hodi halo manutensaun no kustu manutensaun bo’ot.
“Ita haree katak la sufisiente, tanba munisípiu sira ambulánsia ida de’it tenke apoia husi Díli atu evakua pasiente sira, kuandu loron ida iha pasiente na’in tolu to’o haat ba leten karreta ida de’it labele kobre hotu,” nia hateten iha servisu fatin Kaikoli, Díli.
Nia hateten sira hetan apoia husi governu Australia, liuhusi Parseru Dezenvolvimentu Humanu (PHD), dezenvolve ona planu estratéjiku SNAEM nian, matadalan prátika klínika, SOP no ekipamentu medika atu fó kbi’it ba profisionál saúde sira fornese asisténsia pre-hospital ba pasiente antes to’o fasilidade saúde avansadu sira.
Nia hatutan ekipamentu medika sira hanesan ekipamentu soke fuan, monitor fuan nian, pasta primeru sokurro, oxygen, tensimeter, ekipamentu partu nian atu fasilita ekipa fornese asisténsia salva vida bázika ba pasiente.
“Ami haree ekipamentu ne’e importante tebes, tanba durantene’e orsamentu ne’ebé aloka la sufisiente para atu sosa, tanba ne’e tinan ne’e alende sosa balun husu mós apoia husi PHD atu nune’e iha Díli no ambulánsia sira iha munisípiu sira mós iha ekipamentu kompletu iha laran,” nia hatutan.
Nia haktuir orsamentu fiskál 2024, sira hetan alokasaun orsamentu adisionál husi Ministériu Saúde atu sosa tan karretaambulánsia 5 hodi distribui ba munisípiu sira ne’ebé karreta ida de’it, tanba planu governu nian kada munisípiu ida tenke iha karretaambulánsia minimu haat.
Iha parte seluk, Manager Parseria no Nutrisaun, iha The Departament of Foreign Affairs and Trade (DFAT), Antoninho Pereira hateten governu Australia iha kompromisiu kontinua suporta servisu ambulánsia nian intermus kapasitasaun, dezenvolvimentu politika no ekipamentu hodi servi komunidade, liu-liu pasiente sira ho di’ak.
“Ho ekipamentu ne’e ita fiar no esperansa bele salva ema nia moris. Husi governu Australia ami kontinua kompromisiu suporta ne’ebé ami iha liuhusi ami-nia parseru PhD. Espera servisu hamutuk ne’e sei di’ak liutan iha futuru,” nia hateten.