Quinta, Junho 13, 2024
Total visitors: 766366

Primeiru-Ministru (PM) Timor-Leste, Kay Rala Xanana Gusmão, simu visita ofisiál nivel-altu delegasaun India nian, hodi diskute koperasaun bilateral entre rai rua nian ba oin tanba nudar amigu, sira hakarak hola parte iha prosesu dezenvolvimentu Timor-Leste nian.

Primeiru-Ministru (PM) Timor-Leste, Kay Rala Xanana Gusmão, simu visita ofisiál nivel-altu delegasaun India nian, hodi diskute koperasaun bilateral entre rai rua nian ba oin.

Nia dehan iha enkontru ofisiál ne’e, Ministru Estado ba Relasaun Internasionál India, Dr. Rajkumar Ranjan Singh afirma katak governu India iha dispozisaun tomak hakarak ajuda Timor-Leste iha setór oioin, liu-liu setór agrikultura, mina no gas, dezenvolvimentu rekursu umanu prepara ba adesaun Timor-Leste nian ba ASEAN.

“Buat diak ida mak sira prontu atu fo treinamentu ba ita nia ema sira iha setór saúde, diplomasia no ajuda ita prepara aan atu tama iha ASEAN, buat sira ne’e diak tebes.

Labele hanoin katak ami asina ona buat ruma, maibe sira mai fo hanoin katak India iha ita nia kotuk. India hakarak partisipa iha dezenvolvimentu Timor nian iha area ne’ebe sei halo diskusaun tanba ne’e ita sei aproveita vontade no amizade bo’ot husi governu India nian,” nia hateten hafoin enkontru ho Ministru Estado ba Relasaun Internasionál India, Dr. Rajkumar Ranjan Singh nia delegasaun iha Palasio Governu, Dili.

Nia hateten governu Timor-Leste no India, liu husi Ministeriu Negosiu Estranjeiru no Koperasaun sei halo diskusaun klean konaba area koperasaun ne’ebé India bele apoia ho embaixador India ba Indonesia no Timor-Leste, Sandeep Chakravorty.

Iha parte seluk, Ministru Estado ba Relasaun Internasionál India, Dr. Rajkumar Ranjan Singh hateten iha enkontru ASEAN Summit, fulan kotuk, Primeiru-Ministru India anunsiu ona embaixador India ba Timor-Leste, tanba ne’e partikularmente husu Primeiru-Ministru Timor-Leste atu oferese fatin ida hodi hari edifisiu embaixador iha Timor-Leste.

Nia dehan India apoia tebes adesaun Timor-Leste nian ba ASEAN, liu-liu suporta iha programa empoderamentu rekursu umanu atu kria relasaun ne’ebé forte no metin ho nasaun membru sira seluk hamutuk lori dezenvolvimentu ba povu.

“Ba oin ami husu governu Timor-Leste atu autoriza ami servisu iha setór diferente, partikularmente konaba edukasaun, peskiza, explorasaun petroliferu tanba ho esperensia ne’ebé India iha ami hakarak partisipa, nune’e ami bele iha oportunidade hodi suporta dezenvolvimentu iha Timor-Leste,” nia hateten.

Nia hateten governu Timor-Leste, hato’o ona kompromisiu atu kombate moras tuberkulose iha tinan 2025, no governu India mos iha tarjetu atu kombate moras tuberkulose iha India. Entau nasaun rua ne’e bele ajuda malu hodi atinji metas ne’e kombate tuberkulose iha Timor-Leste no India.