- Publika iha: 12 Setembro 2023
Vise-Ministru Komérsiu, Augusto Junior Trindade hateten sira halo ona diskusaun ho empreza importadór fós lima, no iha ona opasaun lubun ida sai hanesan solusaun atu normaliza presu fós iha merkadu, bainhira hetan ona aprovasaun husi Konseillo Ministru.
Nia dehan governu da-sia konsente ho situasaun populasaun nian no iha komitmentu bo’ot tebes atu halo esforsu oioin normaliza presu fós iha merkadu.
“Ami hetan solusaun ida, maibé hau labele hateten lai, tanba ohin duni ami entrega pedidu ofisial dekretu lei ida ne’ebé ami prepara ona ba Konsellu-Ministru atu haree.
Iha opsaun lubuk ida, ha’u hanoin tempu badak sei publika no ami sei konvida mídia hotu kuandu hetan ona aprovasaun no publikasaun,” nia hateten ba jornalista sira, hafoin enkontru Steering Committee ba Portal Informasaun Komersial dala haat, iha edifisiu Banku Mundial Lesidere, Díli.
Nia hateten molok ba tuir enkontru ASEAN, Primeiru-Ministru, Kay Rala Xanana Gusmão, fó ona orietasaun atu liña minsitéiru sira, empreza importadór sira tuur hamutuk ko’alia ba malu oinsa bele normaliza presu iha merkadu.
Nia hatutan Ministéiru Negósiu Estranjeiru no Kooperasaun (MNEK), liuhusi embaxadór sira halo mós karta ofisial ba nasaun sira hanesan India, Vietnam no Kambodia kona-ba presu fós.
Nia haktuir governu mós estabelese ona intelijénsia atu ba vizita armajen sira iha Díli laran, hodi asegura empreza sira la halo manipulasaun ba presu fós, tanba governu hatun ona impostu husi 5% ba 2,5%.
Entretantu, Vise-Presidente CCI-TL ba asuntu Komérsiu no Indústria, Kathleen Gonçalves hateten presu fós iha merkadu nasionál sa’e makas, tanba presu iha nasaun produtór mós sa’e. Entaun atu normaliza presu iha merkadu nasionál, governu tenke fó subsidiu ba empreza sira no halo esforsu hasa’e produsaun rai-laran.
“Presu mundiál, liu-liu nasaun sira ne’ebé hatama fós mai rai-laran folin sa’e makas, tanba implikasaun husi mundansa klimátika halo produsaun menus. Bainhira produsaun menus sira buka dalan liuhusi hasa’e folin,” nia hateten.
Nia konsente governu hatun ona impostu, maibé realidade Timor-Leste, iha dependénsia makas ba importasaun fós. No fós nu’udar aihan prinsipál no esensiál ba povu Timor-Leste.
Nia rekoñese fós 25 kg uluk folin $12 dolar agora sa’e ba $18.50 sentavus iha kapital Díli. Iha munisípiu sira presu sei sa’e tan, entaun komunidade laiha kapasidade sosa ba konsumu lorloron.
Nia informa CCI-TL, dadaun halo esforsu makas atu implementa demoplot iha munisípiu sira, atu enkoraja agrikultór sira halo serbísu hasa’e produsaun.
Iha parte seluk, Xefe Suku Soba Postu administrativu Laga, Munisípiu Baucau, Francisca Monica Fatima Soares hateten agrikultór barak mak tinan ida-ne’e natar la halo, tanba impaktu mudansa klimátika, irigasaun aat. Entaun sira mós depende ba fós importadu.
“Ita agradese ba governu da-sia ne’ebé aprova ona redús taxa importasaun, espera katak sasan sira-ne’e folin tuun no komunidade mós bele sosa. Tanba sira agora iha subsídiu ba Idozu, bolsa da mãe bele sustenta sira-nia nesesidade lorloron nian,” nia hateten.