- Publika iha: 02 Setembro 2023
Ministru Administrasaun Estatal (MAE), Tomás do Rosário Cabral, informa estutu munisípiu Ataúro sai fali governu rejionál, ne’ebé tutela diretamente ba governu sentral, Ministeriu Administrasaun Estatal intermus servisu administrasaun nian tanba la prense rekejitus sai munisípiu ketak.
Nia dehan governu dala-ualu, bazeia ba dekretu lei numeru 3/2016 konaba estatutu administrasaun munisipal, transforma postu Ataúro sai munisípiu ba poder lokal, maibe la prense kriteria.
“Rekejitus lei ba elisaun asembleia municipal ne’e dehan eleitór tenke 33,000 até 50,000. Agora sira iha deit eleitor 6,000 até 8,000 tanba ne’e mak ita governu sentral deklara ona sira mos sei goja ekonómia, entaun sira nia reprezentasaun administrasaun sei rona diretamente husi governu sentrál,” nia hateten hafoin halo abertura ba reuniaun ho autoridade lokal sira konaba aprezentasaun planu investimentu munisípiu, iha salaun Delta Nova Comoro, Dili.
Nia hateten nudar governu rejiaun iha asembleia konstituiva munisípal permanente sira bele kordena no kria mekanismu oinsa atu jere rasik rekursu iha Ataúro.
Nia hatutan Oecusse prense rekejitus tanba ne’e mak ZEEMS iha Rejiaun Administrativu Espesial Oe-cusse Ambeno (RAEOA). Ba Ataúro mos iha ZEEMS ketak, miabe MAE trata liu mak asuntu administrasaun.
Iha parte seluk, Administradór Ataúro, Domingos Soares hateten aprovasaun dekretu lei numeru 4 no 49 konaba organika MAE nian katak Ataúro sai governu rejiaun ne’ebé tutala direta ba governu sentral, signifika Fundu Espesial ba Deznvolvimentu Ataúro (FEDA) direta ba MAE tanba ne’e sei informa oinsa bele avansa ba konstrusaun portu no aeroportu.
“Estudu viabilidade sira halo hotu ona, hein deit aprovasaun proposta dekretu lei governu no alterasaun mak hein fila fali,” nia hateten.
Nia hateten projeitu konstrusaun ba portu no aeroportu tama ona iha planu no orsamentu alokadu iha FEDA, entaun hein fali lalaok sira ne’ebe sei regula.
Nia hatutan dezenvolvimentu infrastrutura bazika sira lao hela, hanesan eletrisidade intermus ligasaun no instalasaun prepagu sira lao hela no bee moos projetu lao hela.