- Publika iha: 02 Setembro 2023
Ministru Administrasaun Estatal (MAE), Tomás do Rosário Cabral, konvoka enkontru ho Presidente Autoridade Munisípiu no Administradór munisípiu sira hotu atu prepara Planu Asaun Anual no planu orsamentu tinan 2024, tanba simu ona kalendariu husi Ministeriu Finansas atu submete.
Nia dehan tuir dekretu lei numeru 3, ne’ebé fo kompetensia ba administrasaun municipal sira atu iha orsamentu no ezekuta rasik. Entau iha tinan 2021, akontese dezastre naturais inundasaun ne’ebé estraga buat barak no iha tinan 2023, fulan Juñu mos akontese dezastre naturais tanba ne’e administradór sira tenke halo levantamentu ba infrastrutura bazika sira.
“Munisípiu ne’e mak komunidade sira hela, liu-liu iha suku no aldeia sira tanba ne’e mak orsamentu sira nian tenke fo prioridade ba infrastrutura bazika sira ne’ebé ita koalia ne’e,” nia hateten hafoin halo abertura ba reuniaun ho autoridade lokal sira konaba aprezentasaun planu investimentu munisípiu, iha salaun Delta Nova Comoro, Dili.
Nia hateten komite revizaun orsamentu mak sei koloka evolope fiscal ba munisípiu sira. Entau atu hetan orsmentu ne’e tenke iha planu asaun anual tanba ne’e director sira fasilita no ajuda prepara planu asaun anual, no husi planu sira ne’e mak sei hetan orsamentu 2024.
Nia informa iha ministeriu kuaze 10 resin mak fo ona servisu ba munisípiu sira tanba ne’e importante atu sira hotu hamutuk prepara planu asaun anual ne’ebé diak hodi hetan alokasaun orsamentu ne’ebe bele koresponde ba implementasaun.
Iha parte seluk, Presidente Autoridade Munisípiu Dili, Guilhermina Filomena Saldanha Reibeiro hateten Dili, presiza orsamentu atu halo dezenvolvimentu, liu-liu responde ba preokupasaun públiku nian durante ne’e melhora infrastrutura sira atu fo espasu ba komunidade sira asesu no kontribui mos reseitas ba estadu.
Nia dehan dadaun ne’e sira iha deit fonte reseita rua mak estasionamentu no publisidade. Husi rua ne’e reseita bo’ot liu mai husi públisidade no tanba limitasaun rekursu, estasionamentu barak mak seidauk kobre.
“Tinan oin mai ami tenke aumenta tan pesoal para bele halo kobertura ba fatin sira ne’ebé iha. Hanesan ministeriu hateten, Cristu Rei mos tenke tau, agora la kobre to’o iha ne’eba.
“Ami mos sei hadia estasionamentu sira, bainhira ita kobra ona husi ema sira ita tenke hadia fasilidade tanba balun komesa aat ona la fo posibilidade no ema mos kestiona sira selu ita tenke hadia, tan ne’e orsamentu tinan oin mai tau hein ministru no membru governu bele ajuda tanba ita hotu hatene Dili presiza orsamentu atu hadia,” nia hateten.
Nia hateten orsamentu tinan 2023, ho montante $13 milloens ne’e, 45% ba deit programa rua mak merenda eskolar $3 milloens no lixu purvolta $3 milloens resin.