Xefe Suku Soba Husu Governu Da-Sia Kontinua Programa Hariii Uma Ba Kbi’it Laek

Xefe Suku Soba, iha Postu Administrativu Laga, Munisípiu Baucau, Francisca Monica de Fatima Soares husu governu da-sia, ne’ebé lidera husi Primeiru -Ministru Kay Rala Xanana Gusmão, atu kontinua implementa programa hariii uma ba kbi’it laek ka Uma Kbi’it Laek (UKL), nune’e povu kbi’it laek sira bele iha fatin dignu no seguru hodi hela.

Nia dehan suku Soba hetan uma hamutuk 18, ne’ebé aldeia neen hetan hotu kada aldeia uma tolu. Husi 18 uma ne’e, uma 13 mak prosesu kontrusaun lao ona no iha uma tolu mak seidauk hahu iha suku Asanunu tanba laiha asesu ba estrada.

“Buat ne’ebé ita hakarak rekomenda ba nonu governu ida-ne’e, mak programa harii uma UKL ne’e tenke kontinua, tanba benefisia tebes ba povu kbi’it laek sira. Ita la’ós fó ba ema hotu, ita fó duni ba ema ne’ebé kbi’it laek duni hanesan inan faluk no sira ne’ebé kbi’it laek tebes,” nia hateten hafoin halo enkontru ho Sekretária Estadu Igualdade (SEI), iha Edifisiu SEI Kaikoli, Díli.

Nia hateten relasiona ho harii uma dignu ba populasaun, programa ne’ebé governu tenke haree fila fali mak UKL Plus, ne’e nia alvu mak uma sira ne’ebé kalen aat ona, uma harii ho meia parede, tanba uma sira meia parede ne’e funsionáriu sira ho level ida ne’ebé natoon nian.

Nia hatutan kona-ba kualidade uma, nia dehan governu mós tenke kontrola kualidade materiál konstrusaun sira ne’ebé importa no sirkula iha merkadu rai laran inklui nia presu.

Iha parte seluk, Ministru Administrasaun Estatal (MAE), Tomas Cabral hateten bazea ba faktu ne’ebé akontese iha Munisípiu Ainaro, liu-liu akontese inundasaun iha fulan kotuk liuba ne’ebé rezulta uma UKL ida fera ba rua mak governu deside halo fali levantamentu hodi haree kualidade uma ne’e molok kontinua implementasaun.

Nia dehan iha kestaun barak ne’ebé governu tenke haree liga ho kualidade konstrusaun, projetu barak iha tinan 2022, maibé konstrusaun seidauk hahu no barak mós lakonsege tenke muda fali ba tinan 2024.

“La’ós atu para, ba halo levantamentu haree fali kustu loloos mak foin komesa fali iha tinan oin,” nia hateten.

Ministru bolu atensaun ba kontatór sira ne’ebé harii uma UKL, tanba faktu hatudu uma ne’e sinta iha rai no leten laiha, entaun uma ne’e nakfera fahe ba rua.

Nia hateten dadaun ne’e sira halo hela lavantamentu hodi identifika problema liga ho kualidade no halo analiza mós ba kustu ne’e rasik, tanba kada uma ho kuartu rua nia kustu $17,000.