- Publika iha: 21 Agosto 2023
Ministru Administrasaun Estatal (MAE), Tomas Cabral, husu administradór munisípiu sira no Prezidente Autoridade Munisípiu atu halo identifikasaun ba projetu sira ne’ebé konstrusaun seidauk remata no sira ne’ebé seidauk halo pagamentu atu bele aselera, tanba sei laiha projetu pendente tama iha Orsamentu Jerál Estadu tinan 2024.
Nia dehan projetu kuaze 10 resin ne’ebé seidauk konklui hanesan projetu konstrusaun jardin no monumentu iha Munisípiu Manatuto, no projetu konstrusaun postu saúde no rezidensia medika iha Fatu Makerek postu Laklubar, konklui ona tinan hitu liuba, maibé seidauk entrega tanba governu seidauk halo pagamentu.
“Iha Fatumaquerec Laklubar ne’ebá uma ne’e hotu tinan hitu ka ualu ona ema labele fó xave atu tama tanba ó la selu nia. Projetu sira-ne’e mak ohin ha’u bolu prezidente Autoridade no Administradór sira, tanba ADN fó fila fali orsamentu $455,000 ho projetu kuaze 10 inklui projetu konstrusaun sede suku Madohi iha Munisipiu Díli, ne’ebé sira uza tiha ona, maibé seidauk selu,” nia hateten hafoin enkontru ho Administradór Munsípiu Manatuto, Ainaro no Sekretaria Presidente Autoridade Munisipiu Díli, iha Edifisiu MAE Colmera, Díli.
Ministru rekoñese problema ne’e akontese, tanba administradór no tékniku sira iha munisípiu nunka tun ba baze hodi haree prosesu kontrusaun sira.
Nia husu administradór no prezidente autoridade sira atu identifika projetu ne’ebé seidauk remata aselera atu konklui iha fin do ano tinan 2023, no projetu sira ne’ebé konklui ona halo pagamentu atu governu bele utiliza.
“Orsamentu iha hela tanba ne’e mak ohin ha’u bolu sira mai iha ne’e atu ba buka tuir ema sira ne’e halo pedidu mai para ba selu. Nia problema ne’e la’ós osan, tanba osan iha hela, iha kraik mak la komunika malu halo ema balun hein to’o mate ona tanba tinan hitu até ualu ona,” nia lamenta.
Ministru mos orienta administradór munisipiu sira atu halo planu orsamentu tinan 2024, hodi hadia povu nia moris iha nivel lokal.
Iha parte seluk, Sekretáriu Munisípiu Manatuto, Eduardo Guterres rekoñese sira iha projetu neen mak sei pendente hela ka seiduak konklui, tanba iha situasaun Covid-19, mobilizasaun material sira difisil no fatór mudansa klimátika, ne’ebé kontribui projetu sira-ne’e lori tempu naruk.
“Projetu neen, ida kona-ba merkadu, jardin no monumentu, no postu saúde iha Fatumaquerec, iha Funar no Aimetilaran mós postu saúde,” nia hateten.
Nia dehan projetu sira-ne’e maioria fisiku konklui ona, liu-liu postu saúde iha suku Fatumaquerec, suku Funar no suku Barique, ne’ebé sei entrega iha tempu badak. Kona-ba projetu jardin no monumentu mak sei presiza tempu, maibégarantia fin do ano konklui.
Nia hatutan projetu Jardin sei hela orsamentu $16,000, tau asesoris iha monumentu $200,000 resin, Postu Saúde iha Fatumaquerec $48,000, postu saúde Funar iha $90,000 no Aimetilaran ne’e $42,000.