Quinta, Junho 13, 2024
Total visitors: 766366

Diretór Ezekutivu Forum NGO Timor-Leste (FONGTIL), Valentim da Costa Pinto lamenta ho aktu lider partidu polítiku sira-nian ne’ebé kontinua utiliza linguajen la edukativu no termu ladignu hasoru ema ne’ebe moris ho defisiénsia durante hato’o propaganda polítika iha ámbitu kampaña polítika iha baze.

Diretór Ezekutivu Forum NGO Timor-Leste (FONGTIL), Valentim da Costa Pinto lamenta ho aktu lider partidu polítiku sira-nian ne’ebé kontinua utiliza linguajen la edukativu no termu ladignu hasoru ema ne’ebe moris ho defisiénsia.

Nia salienta Timor-Leste asina ona dokumentu deklarasaun fraternidade umana hodi harii pás no armonia tanba ne’e lider partidu polítiku sira tenke tau prinsípiu ida-ne’e iha prátika, liu-liu uza linguajen ne’ebé edukativu no promove unidade nasionál, la’ós nakonu ho insulta malu.

“Ita observa iha kampaña palku husi partidu polítiku ne’ebé kontinua hateten liafuan beik. Ita mós haree iha media sosial sira hanesan Facebook no YouTube sira ita kontinua observa katak ida-ne’e sira halo. FONGTIL lakohi indika partidu ne’e sé, maibé situasaun ida-ne’e akontese iha terenu,” nia hateten liuhusi konferénsia impresa iha edfisiu FONGTIL Kaikoli, Díli.

Nia dehan períodu kampaña nu’udar oportunidade ne’ebé di’ak ba partidu polítiku sira atu hato’o planu no programa tinan lima oin mai nian, bainhira hetan fiar husi povu liuhusi festa demokrasia.

Nia rekomenda mós ba partidu polítiku sira uza linguajen ne’ebé dignu ba portadór defisiénsia sira hanesan ema ho nesesidade espsial, ema ho diferente abilidade ka ema ho defisiénsia. Labele uza termu sira-ne’ebé la merese hanesan la normal, alezadu, matan aat ka matan delek, tilun diuk, bulak, ain aat, liman aat.

Iha parte seluk, Porta Voz Ema ho Defisiensia Matan, ne’ebé halibur aan iha Asosiasaun Halibur Defisiénsia Matan Timor-Leste (AHDMTL), Cárceres Nunes Arcatura hateten sira hala’o observasaun ba kampaña partidu polítiku sira durante semana ida hahú 19 abril.

“Tuir AHDMTL nia observasaun durante semana ida nia laran, partidu polítiku sira hala’o sira-nia atividade kampaña polítiku, ami observa katak, sira rekoñese ona ema ho defisiénsia, maibé la respeita ema ho defisiénsia nafatin utiliza termu ne’ebé ladignu hodi komunika ba ema ho defisiénsia. No sira promove ona ema ho defisiénsia, maibé la proteje ema ho defisiénsia tanba laiha asesibilidade ba ema ho defisiénsia,” nia hateten.

Nia dehan partidu polítiku sira iha direitu atu hato’o propaganda polítika no ko’alia sira-nia programa, maibé sira viola prinsípiu dirietu umanu katak respeita, rekoñese, promove no proteje, ne’ebé la adopta iha sira-nia kampaña.

Nia mós husu ba partidu polítiku sira atu labele utiliza ema ho defisiénsia sira hanesan instrumentu iha sira-nia programa polítiku.