Terça, Maio 21, 2024
Total visitors: 766366

Prezidente Bee Timor-Leste, Empreza Públika (BTL, E.P), Carlos Peloi dos Santos informa projetu konstrusaun fornesimentu sistema bee moos no tanki rezervatóriu iha Postu Administrativu Laclubar Villa, Munisípiu Manatuto, ho montante orsamentu hamutuk $656,941.95.

Prezidente Bee Timor-Leste, Empreza Públika (BTL, E.P), Carlos Peloi dos Santos informa projetu konstrusaun fornesimentu sistema bee moos no tanki rezervatóriu iha Postu Administrativu Laclubar Villa, Munisípiu Manatuto, ho montante orsamentu hamutuk $656,941.95.

Nia salienta projetu ne’e iha pakote rua, ida mak konstrusaun sistema fornesimentu bee moos husi bee matan Leanbau no bee matan Hatuada, ne’ebé lokaliza iha foho Samaur área suco Manelima ho elevasaun 1,361 m no 1,417 m ho montante $468,906.58, ne’ebé responsabiliza husi kompaña Celijo Star Unipessoal, Lda. No pakote konstrusaun tanki rezervatóriu 6m³ unidade haat ho montante osan $188,035.32, ne’ebé kaer husi kompaña lokal Twins 2 Unipessoal, Lda.

“Husi 48 kapital postu administrativu sira-ne’ebé la’ós parte husi kapital munisípiu, ita promove ona projetu hamutuk 31 iha kapital postu inklui Laclubar ne’ebé ohin ita asina kontratu ne’e. Ita sei iha kapital postu 17 mak seidauk promove, maibé levantamentu dadus halo hotu ona no tékniku sira halo hela dezeñu BOQ,” nia hateten hafoin asina kontratu ho kompaña lokal rua ba projetu kanalizasaun bee moos iha postu Laklubar, iha edifisiu BTL, Kaikoli, Díli.

Nia dehan kapital postu administrativu 17 ne’e, postu 7 mak dezenho BOQ atinji ona 95% tanba ne’e tempu badak sei asina tan kontratu atu hahú konstrusaun ba sistema bee moos iha ne’ebá. Ba postu 10 seluk dezeñu BOQ foin 30% presiza tempu konklui.

Nia hateten projetu melloramentu sistema bee iha kapital postu administrativu sira ne’e la’ós de’it fornese bee ba uma-kain sira, maibé benefisia mós fasilidade públiku sira hanesan igreja, kapela, eskola, sentru saúde, postu saúde, sede suku.

Nia hatutan BTL foku makas atu mellora sistema bee moos iha nivel urbanu nian atu liberta problema falta bee moos iha urbanu. Maibé prepara mós dezeñu BOQ ba sistema bee rurál sira ne’ebé ho distánsia 2 km no mobiliza rekrusu esternu husi parseiru hanesan Plan Internasional, Water Aid, Care Internasional, CVTL no UNICEF atu bele apoia. Ba sistema sira ne’ebé menus husi 2 km, sira apoia material no tékniku ba komunidade atu dada rasik bee.

Nia informa durasaun ba projetu kanalizasaun sistema durante fulan neen no konstrusaun tanki rezervatoriu fulan haat.

Iha parte seluk, Administradór Postu Laclubar, Francisco Soares espera projetu melloramentu ne’e bele responde ba nesesidade komunidade nian, tanba tinan barak sira halerik ba bee moos.

“Ita hatene tinan naruk, hahu tinan 2000 to’o mai agora bee moos ne’e ita bele dehan hetan asesu no uza, maibé uza tuir ida-ne’ebé iha. Sistema bee ne’ebé estadu kontrui ka dada ba komunidade ne’e foin primeira-vés akontese,” nia hateten.

Nia hateten totál populasaun iha postu administrativu Laclubar hamutuk 17,000, ne’ebé hela namkari. Maibé fornesimentu sistema bee moos ne’e sei kobre de’it uma-kain sira ne’ebé iha villa inklui fasilidade públiku hamutuk 13.