- Publika iha: 17 Abril 2023
Asesór Prinsipál Ministériu Agrikultura no Peskas (MAP), Frumêncio Araújo hateten rai potensiál ba produsaun hare iha territóriu nasionál hamutuk ektare 80,000, maibé foin mak kultiva ka esplora de’it ektare 30,000 iha ektare 50,000 mak abandonadu hela.
Nia salienta governu bele halo irigasaun di’ak barbarak, maibé depende hotu ba udan been de’it mak sei la rezolve problema tanba ne’e atu dezenvolve setór ida-ne’e hodi garantia soberanu aihan mak tenke investe halo barajen barak akapta udan-been.
“Agora dadaun ita-nia dadus ba natar iha Timor-Leste, pontensiál natar ita iha ektare 80,000, maibé to’o agora ita esplora ona purvolta ektare 30,000 mak ita halai ona no ita abandona hela 50,000, entaun dadus ne’ebé xefe suku sira aprezenta ne’e reprezenta parte balun husi 50,000 ne’ebé seidauk esplora ho didi’ak,” nia hateten bainhira sai oradór iha diálogu nasionál selebrasaun loron mundial bee, iha salaun City 8 Maneluana, Díli.
Nia dehan husi ektare 30,000 ne’ebé halo kultiva, kada tinan kolleta dala ida de’it tanba bee menus tanba ne’e produsaun sei menus atu responde ba demanda konsumu nasionál ba nesesidade foos iha rai-laran.
Nia hateten Timor-Leste nia nesesidade konsumu foos kada tinan, bazeia ba importasaun husi nasaun Vietnam no Thailandia kuaze tonelada rihun 130 até 160. Maibé produsaun iha tinan 2022, atinji de’it foos tonelada rihun 86, signifika sei falta tonelada 50 até 80.
“Kuandu tinan ida halai dala rua, ne’ebé kapasidade produsaun tonelada rihun 86 multiplika ba dala rua bele responde ona tonelada rihun 172 kada tinan mak ita ultrapasa ona demanda nasionál no ita bele garantia seguransa alimentar, hadia nutrisaun, kadeia valór di’ak liutan, komunidade konsumu aihan nutritivu no eleva padraun moris agrikultura nian kuandu ita-nia produsaun aumenta osan sirkula iha rai-laran de’it ,” nia hateten.
Nia hatutan bee nu’udar fatór determinante ba setór agrikultura, maibé durante ne’e setór agrikultura atu la’o depende de’it ba udan-been tanba ne’e atu setór ida-ne’e dezenvolve di’ak hodi garantia soberanu aihan mak tenke investe hodi harii barrajen ho kapasidade bo’ot atu akapta udan bee iha tempu udan no distribui ba agrikultór sira iha tempu bailoron.
Entretantu, Xefe Suku Cassa iha postu administrativu Ainaro, munisípiu Ainaro, Longuinhos de Araújo hateten governu tenke halo investimentu ne’ebé apropriadu ba setór agrikultura atu asegura fatin potensiál sira halo kultiva hodi hasa’e produsaun rai-laran tanba fatin potensiál barak mak abandona hela.
“Natar fatin hamutuk ektare 180, maibé agora dadaun sira sei uza de’it manual, katak mota tuun makas lokraik agrikultór sira ba kee fali bee dalan ne’ebé mota bo’ot taka. Entaun dadaun ne’e mota bee lulik fó ameasa ba natar fatin tanba ne’e sira halo de’it ektare 40 restu seidauk halo abandona hela tanba mota fó ameasa,” nia hateten.
Nia dehan natar barak mak sei abandona tanba kondisaun irigasaun ladi’ak obrigadu agrikultór sira kee ho liman de’it, entaun barak lakon vontade atu halo kultiva.
Iha parte seluk, Xefe suku Fahiria iha postu administrativu Aileu Villa, Munisípiu Aileu, Alberto Lou-Teus hateten tinan ida-ne’e nia komunidade sei enfrenta problema hamlaha tanba bailoron naruk laiha bee labele halo produsaun.
“Posibilidade suku fahiria tinan ida-ne’e hasoru hamlaha tanba ita kuda hare , halo modo ita depende ba de’it udan-been. Ita-nia natar iha leten mota iha kraik entaun posibilidade suku ne’e hasoru problema hamlaha iha tinan ida-ne’e.” Xefe suku Fahiria dehan.
Nia haktuir suku ne’e iha totaál populasaun 2574 no 95% populasaun moris iha vida agrikultór, liu-liu agrikultura no hortikultura.