- Publika iha: 14 Abril 2023
Xefe Unidade Ambientál UNDP iha Timor-Leste, Domingos Leguisiga Maria dehan mudansa klimátika ne’ebé kada tinan sempre akontese ne'e tanba kauza husi atividade agrikultura halo to'os.
Nia dehan, banhira komunidade halo atividade halo to'os kada tinan sempre muda ba mai no tesi ai sunu rai ikus mai tenke akontese mudansa klimátika.
"Mudansa klimátika ne'e akontese afeta ba bee matan barak mak maran, no bee komesa menus, komunidade rasik kontinua halerik ba bee," nia dehan.
Nia dehan, haree ba problema hirak ne'e UNDP servisu hamutuk ho NGO Perma Kultura Timor-Leste (Permatil) iha inisiativa apoiu joven sira hodi halo konservasaun bee.
"Ita organiza joven sira ho matenek lokal ne’ebé mak sira iha hodi kria debu iha foho leten hodi konserva udan ben, nune'e mós ita kuda ai-oan sira ne’ebé bele fó moris bee," Xefe Ambiental UNDP Maria dehan iha City8.
Nia dehan, bee matan barak maran, kauza husi mudansa klimátika komunidade agrikutór sira halo toos tesi ai no sunu rai muda fatin ba mai ida-ne’e mak hodi rezulta bee komesa menus ho maran.
"Ita husu ba komunidade agrikultór sira banhira halo to'os no atu muda ba fatin seluk tenke kuda ain oan sira ne’ebé fo moris bee atu bele substitui fali ai sira ne’ebé mak sira tesi ona nune'e labele akontese mudansa klimátika nune'e mos bee labele maran," nia hatete.
Iha parte seluk, Membru Parlamentu Nasional, Deputadu Mariano Asanami Sabino dehan, komunidade iha área rurál ne'e maioria moris hanesan agrikultór hodi sustenta sira-nia moris.
"Bainhira ita bandu sira labele tesi ain no sunu rai, bahan lor-loron ne’ebé sira han atu hetan iha ne'e," nia dehan.
Tanba ne'e nia dehan, liga ba situasaun mudansa klimátika ne’ebé akontese ne'e governu ho nia parseriu Internasionál no lokál iha kompeténsia atu halo sosializasaun ba komunidade oinsá tesi ai ida (1) kuda fali sanulu (10) atu nune'e sira bele tesi ai hodi halo toos bainhira tempu to'o sira bele kuda fali ai.