- Publika iha: 23 Março 2023
Diretor Servisu Munisipal Obras Publika, Transporte, Agua, Saneamentu, Ambiente, Registu Notariadu no Servisu Kadastrais, Munisipiu Atauro, Bonifacio Soares informa uma kain 286 husi total 2454 mak asesu ona ba bee moos husi sistema kanalizasaun, purvolta 2168 mak seidauk asesu bee moos.
Nia salienta munisipiu Atauro iha bee matan barak hanesan bee matan Belau, Tibalai, no Egoa, maibe iha tempu udan akontese dezastre naturais sobu sistema kanalizasaun, entau komunidade labele asesu ba bee ho diak.
"Agora so iha deit 286 familia mak asesu ona ba bee moos husi sistema kanalizasaun, barak mak asesu bee iha bee matan, bee mata bomba, uza udan been no bee possu," nia hateten iha servisu fatin Suku Maumeta, Munisipiu Atauro.
Nia hateten uma kain ne'ebe asesu ba bee moos maioria husi suku Maumeta, Beloi no Biqueli. Suku Macadade balun asesu ona bee moos, maibe barak mak sei asesu ba matan.
Nia hatutan husi suku lima iha munisipiu Atauro, aldeia hat mak sei asesu ba udan been durante tinan barak.
Iha parte seluk, Xefe Suku Biqueli, Daniel Martins hateten komunidade sira ne'ebe ita parte villa asesu ba bee diak, maibe ita parte foho leten asesu deit bee possu no udan been.
"Sira ne'ebe hela iha foho ne'e purvolta 140 familia mak asesu udan been. Aldeia Iliduadoro no aldeia Uaruana familia 150 mak seidauk asesu ba bee moos, sira asesu ba bee possu ne'ebe ita bele dehan tasi been," nia hateten.
Nia dehan sira halo ona pedidu ba administrador munisipiu no sira hato'o ona ba Bee Timor-Leste Empreza Publika, no sira dada ona bee ba Familia ne'ebe konsumu bee possu, maibe kanu hetan estragus. Mekanismu seluk mak agensia UNDP apoia NGO Roman Foun ba Futuru halo transformasaun tasi been ba bee moos.
Nia hatutan komunidade sira mos hetan apoia tanki bee nian hodi konserva udan been atu bele utiliza ba konsumu lorloron nian.
Nia haktuir total xefe familia iha suku Biqueli hamutuk 725 no husi ne'e maioria asesu udan been no bee possu.