Sexta, Março 01, 2024
Total visitors: 760811

Diretór Jerál, iha Sekretária Estadu Formasaun Profisionál no Empregu (SEFOPE), Paulo Alves hateten rezultadu peskiza forsa traballu iha Timor-Leste tinan 2021, hatudu taxa dezempregu jerál sei 5,1%, signifika tuun 6% kompara ho taxa 11% iha tinan 2013.

Diretór Jerál, iha Sekretária Estadu Formasaun Profisionál no Empregu (SEFOPE), Paulo Alves hateten rezultadu peskiza forsa traballu iha Timor-Leste tinan 2021, hatudu taxa dezempregu jerál sei 5,1%, signifika tuun 6% kompara ho taxa 11% iha tinan 2013.

Nia salienta peskiza ne’e hala’o iha tinan 2021, ho servisu hamutuk entre SEFOPE no Diresaun Jerál Estatístika hetan apoia husi Organizasaun Internasional ba Traballu (ILO), ne’ebé rezultadu publika ona taxa dezempregu tuun ba 5.1%.

“Ita haree fali peskiza ne’ebé uluk ita halo iha tinan 2013, ita-nia taxa dezempregu ne’e ita iha 11%. Maibé depois ita halo fali peskiza iha tinan 2021, taxa dezempregu ne’e tuun ba 5.1%. Ida ne’e dadus ha’u la’ós ko’alia naran siik de’it, ne’e rezultadu husi peskiza ne’ebé publika tiha ona no ema hotu hatene ona taxa dezempregu tuun makas husi 11% tuun to’o 5,1%,” nia hateten iha Timor Plaza, Díli.

Nia dehan rezultadu refere hatudu atinji ona meta planu estratéjiku nasionál setór empregu tinan 2030, tanba konsege redús taxa dezempregu to’o 5,1% iha tinan 2021.

Nia konsente iha peskiza ne’e mós hatudu taxa dezempregu iha idade 15 ate 24 sei aas 9, 6% tanba ne’e governu investe makas iha polítika formasaun profisionál atu eleva kapasidade no abilidade joven sira-nian iha área téknika hodi responde ba indústria merkadu.

Nia hateten espetativa joven sira-nian bo’ot tebes atu hadia sira-nia koñesimentu iha área téknika nian tanba ne’e importante tebes atu investe iha infrastrutura no fasilidade sira atu akumula joven sira-ne’ebé interese bo’ot atu hadia sira-nia koñesimentu iha área téknika.

Entretantu, Diretór Jerál Estatístika, Elias dos Santos Ferreira hateten peskiza forsa laborál ba dala haat ne’e, hatudu taxa dezempregu iha populasaun idade tinan 15 ate 64 iha 5, 1%, maibé grupu idade 15 ate 24 sei aas iha 9, 6%.

“Hanesan ema tékniku enkoraja ema sira-ne’ebé uza dadus ne’e ho didi’ak. Dadus ne’e emerjente atu ita labele dehan tuir ha’u-nia hanoin no haree, maibé tuir peskiza ne’e mak klaru liu tanba ita servisu ho ajénsia internasionál sira uza prátika internasionál,” nia hateten.

Nia dehan peskiza ne’e halo kada períodu tinan tolu, ne’ebé loloos halo iha tinan 2019, maibé iha momentu ne’e halo peskiza sensu agrikultura nian. Depois mosu surtu Covid-19 no halo tan sensu populasaun tanba ne’e realiza iha tinan 2021.

Iha parte seluk, Joven José Soares hateten polítika empregu esternu nu’udar asaun pozitivu governu nian atu redús taxa dezempregu iha rai-laran, maibé importante mos kria empregu iha rai-laran atu ema hotu bele hetan oportunidade servisu.

“Ha’u hanoin bele taxa dezempregu tuun tanba ema barak mak sai ba servisu iha Australia no Korea, maibé importante mós governu tenke hanoin ona atu kria kampu servisu iha rai-laran no hadia kualidade formasaun profisionál atu prepara joven sira ba indústria merkadu iha rai-laran no rai-liur,” nia hateten.