Sexta, Março 01, 2024
Total visitors: 766366

Xefe Suku Camea Postu-Administrativu Cristo Rei, Munisípiu Díli, Matos da Costa informa tinan 20 resin populasaun Aldeia Lenuc Hun no Aldeia Ailele Hun asesu de’it ba bee-matan antigu tanba governu seidauk halo instalasaun sistema kanalizasaun bee moos.

Xefe Suku Camea Postu-Administrativu Cristo Rei, Munisípiu Díli, Matos da Costa informa tinan 20 resin populasaun Aldeia Lenuc Hun no Aldeia Ailele Hun asesu de’it ba bee-matan antigu tanba governu seidauk halo instalasaun sistema kanalizasaun bee moos.

Nia salienta tinan-tinan sira halo proposta ba governu liuhusi projetu PEDM Munisípiu Díli nian atu halo kanalizasaun bee moos ba komunidade aldeia rua refere, maibé seidauk iha iha rezultadu.

“Aldeia rua ne’ebé grave liu mak Aldeia Lenuc Hun no Ailele Hun, durante ne’e sira uza bee-matan ne’ebé be’iala sira husik hela ba konsumu. No sira aproveita ho udan-been, ne’e mak sira-nia situasaun real to’o agora sei nafatin,” nia hateten iha Matadoru, Díli.

Nia dehan lorloron oras tuku 4 madrugada komunidade forma ona iha bee-matan atu kuru bee no sira ne’ebé tarde tenke hein atu bee nakonu fali mak foin kuru tanba kondisaun klima kuantidade bee la barak.

Nia hateten Suku Camea iha aldeia hamutuk 13 hanesan Aldeia Aidac Bihare, Ailoc Laran, Bedois, Buburlau, Caisabe, Fatuc Francisco, Has Laran, Lases, Namalai, Sucu Laran, Terminal, Ailele Hun, no Lenuc Hun.

Nia hatetan Aldeia Lenuc Hun ho totál xefe família hamutuk na’in 127 no populasaun 600 resin, no aldeia Ailele Hun ho xefe família 90 no populasaun 300 resin.

Enkuantu Xefe Suku Balibar, Postu-Administrativu Cristo Rei, Munisípiu Díli, Afonso Pereira hateten komunidade Aldeia Tancae no Lorico mak sei asesu ba bee mota Bemori nian.

“Uma-ka’in 100 resin hanesan ne’e seidauk iha asesu ba bee moos ne’ebé fornese husi governu tanba programa Planu Nasionál Dezenvolvimentu Suku seidauk tama, maibé agora tinan 2023, ami esforsu aan atu sira mós bele hetan asesu bee,” nia hateten.

Iha parte seluk, Prezidente Bee Timor-Leste, Empreza Públika (BTL, E.P), Carlos Peloi dos Reis hateten kontratu no dezeñu sistema instalasaun bee iha munisípiu Díli finaliza ona tempu badak tama ba faze tenderizasaun.

“Ba Díli nian, nain sira akompañia fulan hira ba kotuk ita asina akordu ho Banku Mundial atu finansia parte Díli Leste ho kustu millaun 121 dolar amerikanu no Díli oeste asina akordu ho ADB millaun 127, entaun kuaze millaun 248 ba Díli de’it,” nia hateten.

Nia hateten alende fundu imprestimu husi Banku Mundial no ADB, iha mós grand husi governu Australia ho montante millaun 6 dolar Australia hodi hadia sistema bee Tohumeta no Lakotu Mutudare, ne’ebé tinan kotuk bee sobu atu komunidade bele iha fali asesu ba bee.

Nia rekoñese aldeia balun iha munisípiu Díli seidauk asesu ba bee moos, maibé sira nafatin halo esforsu atu promove projetu iha nivel postu no suku sira.