Quinta, Dezembro 08, 2022
Total visitors: 692025

Diretór Nasionál Kafé no Plantas Indústria, iha Minsitériu Agrikultura no Peska (MAP), Mario Godino hateten durante tinan lima 2017-2022, implementasaun projetu Ai ba Futuru, husi governu parseria ho GIZ konsege distribui no kuda ai oan hamutuk millaun 4.2 iha munisípiu Manatutu, Baucau, Lautem, no Viqueque.

Diretór Nasionál Kafé no Plantas Indústria, iha Minsitériu Agrikultura no Peska (MAP), Mario Godino hateten durante tinan lima 2017-2022, implementasaun projetu Ai ba Futuru, husi governu parseria ho GIZ konsege distribui no kuda ai oan hamutuk millaun 4.2 iha munisípiu Manatutu, Baucau, Lautem, no Viqueque.

Nia salienta projeitu Ai ba Futuru ne’e remata ona, signifika automatikamente governu tenke foti responsabilidade atu kontinua atividade agrofloresta iha área rurál hodi fó empregu ba rendimentu iha área rurál.

“Polítika governu nian kontinua nafatin tanba ita iha ona grupu iha munsípiu haat iha komunidade, ne’ebé ohin sira simu ona sertifikadu. Ita la husik projetu ida ne’e, maibé ita presiza halo avaliasaun tanba baut barak di’ak sira halo no buat balun mós ladun di’ak ita hadia no kontinua,” nia hateten bainhira partisipa iha atividade espozisaun ikus ba rezultadu projetu Ai ba Futuru, iha Timor Plaza, Díli.

Nia dehan ai oan ne’ebé kuda kompostu husi ai produsaun, ai konservasaun no ai han sira tanba topografia Timor-Leste nian la serve atu kuda produtu ai industria nian.

“Ita-nia topografia Timor-Leste ne’e tuir loloos la serve atu kuda produtu ai Indústria tanba ita foho mak barak rai tetuk oituan de’it, entau ita halo konbinasaun iha modelu ne’e mak bolu agrofloresta katak ita kuda ai indústria, konservasaun no aifuan, nune’e to’o tempu kolleta ai konservasaun husik hela atu konserva rai, bee no animál nia fatin no ba ai produsaun mak ita bele tesi ou kolleta,” nia haktuir.

Nia hateten sira mós prodús ona matadalan estratejia agrofloresta nian, ne’ebé bele guia parseiru sira seluk ne’ebé atu implementa atividade agrofloresta iha munisípiu sira seluk.

Iha parte seluk, Asesór Tékniku ba Projetu Ai ba Futuru, husi GIZ, Frenky Monteiro hateten projetu mak remata, maibé atividade agrofloresta tenke kontinua ho promosaun sustentável atu kria empregu ba rendimentu iha área rurál ne’ebé hasoru obstáklu mudansa klimátika.

“Ita fiar katak atividade barak ne’ebé ita halo ona sei hetan konsiderasaun atu kontinua hodi komunidade ne’ebé hetan ona benefísia atu mellora sira-nia moris di’ak liután no kria empregu di’ak liután iha munisípiu sira,” nia hateten.

Nia dehan durante tinan lima sira distribui no kuda ai oan hamutuk milaun 4.2 ho ai oan oin 53 ba komunidade atu kuda iha to’os, ba sentru veiveru, eskola sira atu aprende tanba prátika agrofloresta mak prátika di’ak liu atu adapta ho mudansa klimátika.

Nia hatutan iha mós atividade edukasaun no kapasitasaun ba komunidade, lideransa komunitária, estensionista sira no grupu produtór sira kona-ba koñesimentu tékniku no abilidade jestaun negósiu atu bele iha sustentabilidade rendimentu ba família.