Quinta, Dezembro 08, 2022
Total visitors: 692025

Prezidente Konsellu Administrasaun Eletrisidade Timor-Leste, Empreza Públika (EDTL, EP.), Paulo da Silva informa to’o tinan 2022, koobertura distribusaun liña eletrisidade nível suku atinji ona 93% hela 7% ou 32 suku husi 452 suku iha territóriu nasionál mak seidauk asesu ba enerjia eletrisidade.

Prezidente Konsellu Administrasaun Eletrisidade Timor-Leste, Empreza Públika (EDTL, EP.), Paulo da Silva informa to’o tinan 2022, koobertura distribusaun liña eletrisidade nível suku atinji ona 93%.

Nia dehan sira garante suku 7% ne’e sei konklui iha primeiru trimestre tinan 2023. Signifika koobertura nível suku konklui, maibé nível aldeia barak seidauk asesu.

“Ita iha 59 suku mak seidauk, agora ita rezolve ona suku 11, 100% konklui ona hela restu mak ita sei konklui, entaun iha fulan Dezembru tinan ida ne’e purvolta 93% ita konklui ona, hela 7%. Ne’ebé iha primeru trimestre tinan oin ita bele konklui nível suku. Nível aldeia sei barak, entaun aldeia sira ita dudu ho prosesu ida bolu polítika eletrifikasaun komunitária atu ita aselera, ne’e prosesu hahú ona iha fatin balun,” nia hateten iha servisu fatin Kaikoli, Díli.

Nia hateten polítika eletrifikasaun komunitária ne’e polítika ida ne’ebé sira introdús atu iha servisu konjunta entre EDTL no komunidade hodi aselera servisu distribusaun liña eletrisidade iha nível aldeia tanba distánsia kilometru ida no rua loke hotu prosesu tenderizasaun ne’e lori tempu naruk.

Iha parte seluk, Diretór Ezekutivu Organizasaun Luta Hamutuk, José da Costa hateten atu aselera servisu distribuisaun liña eletrisidade ba suku hotu-hotu iha tinan 2023, maka projetu hotu tenke liuhusi prosesu tenderizasaun atu garantia servisu la’o no komunidade bele iha asesu ba eletrisidade.

“Luta hamutuk durante ne’e akompaña ita hatene katak la’ós governu mak laiha kapasidade. Uluk iha Ministériu Obras Públika nia okos mós la’ós governu mak laiha osan, maibé ita-nia maluk emprezáriu lokál sira mak hadau malu entaun nia implika ba ita-nia povu,” nia hateten.

Nia dehan durante ne’e projetu ne’e fó ba veteranu sira tanba kapitál laiha faan tutan tan to’o iha terenu hadau malu servisu lala’o komunidade la asesu ba eletrisidade.

Nia hateten kestaun ne’ebé dadaun ne’e komunidade enfrenta mak asesu ba pulsa eletrisidade iha munsípiu, postu administrativu no suku sira ne’ebé do’ok tanba ne’e EDTL, EP tenke iha politika ida di’ak atu asegura komunidade iha asesu ba pulsa eletrisidade ho lalais.