Quinta, Dezembro 08, 2022
Total visitors: 692025

Ministru Turizmu, Komérsiu no Indústria (MTCI), José Lucas do Carmo da Silva enkoraja grupu benefisiáriu programa rekuperasaun ekonomia iha territóriu nasionál atu re-ativa atividade no kontinua halo inovasaun ba kreatividade hodi dezenvolve sítiu turizmu iha área rurál sai destinasaun turistíka ne’ebé furak no konfortável ba visitante sira.

Ministru Turizmu, Komérsiu no Indústria (MTCI), José Lucas do Carmo da Silva enkoraja grupu benefisiáriu programa rekuperasaun ekonomia iha territóriu nasionál atu re-ativa atividade no kontinua halo inovasaun ba kreatividade hodi dezenvolve sítiu turizmu iha área rurál sai destinasaun turistíka ne’ebé furak no konfortável ba visitante sira.

Ministru konsiente tinan rua liubá setór turizmu hetan afeta makaas husi surtu Covid-19 no situasaun dezastre naturais ne’ebé akontese iha loron 4 fulan Abril tinan 2020, tanba ne’e governu hamosu programa no fundu rekuperasaun atu hakmaan mikro pekena media empreza sira.

“Ida ne’e la’ós fundu bo’ot ida atu fó ba ita bo’ot sira halo dezenvolvimentu iha ne’ebá, maibé atu rekupera de’it ka hakmaan ita bo’ot sira iha tempu difisil ne’e fila fali ba halo atividade,” nia hateten bainhira partisipa iha serimónia asina kontratu entre MTCI ho benefisiáriu ba fundu planu rekuperasaun ekonomia-mikro pekena media empreza turizmu, iha Farol, Dili.

Nia dehan fundu rekuperasaun ekonomia, sira hetan alokasaun orsamentu ho montante milaun $5 ba área turizmu, komérsiu no indústria, liu-liu apoia mikro pekena media empreza sira.

Nia hateten proposta ne’ebé sira simu husi grupu sira hamutuk 15000, husi territóriu nasionál, maibé orsamentu ne’ebé aloka la sufisiente mak grupu 663 kompostu husi sítiu turístiku no arte jenatu mak hetan apoia no sai benefisiáriu ba programa rekuperasaun ekonomia iha área turizmu nian.

“Husu ita bo’ot sira atu responsabiliza ba transferénsia ne’ebé sei transfere ba ita bo’ot sira-nia konta bankária, tanba ita bo’ot sira hatene maské ne’e transferénsia públika, maibé nia regra iha nafatin katak ekipa sei halo vizita no konfirmasaun ba ita bo’ot sira-nia fatin,” nia husu.

Nia hatutan governu mós iha fundu ne’ebé própriu no adequadu bolu kréditu suave atu fó kréditu ba empreza sira ne’ebé hakarak dezenvolve sira-nia atividade bo’ot liu tan.

Enkuantu, Kordenadór Fatin Turizmu Laletek Katarosa no Laletek Nanis Domin, iha Dare, Ronaldo Reicardo Tilman Pereira Jeronimo hateten sira presiza tebes apoia fundu atu implementa sira-nia planu halo inovasaun ba fatin hodi atrai ema vizita.

Nia dehan kustu ne’ebé sira aplika ba vizitante sira mak $1 dolar amerikanu kada ema ida atu asesu tama ba fatin turizmu no hasai foto iha fatin ne’ebé sira prepara ona hanesan Eiffel tower.

“Uluk loke foun-foun kada loron ami hetan $400 dolar amerikanu, agora ema ladun vizita ona ema menus tebes, loron ida ami bele hetan de’it $15 to’o $20 dolar amerikanu,” nia hateten.

Nia hateten sira iha planu atu halo inovasaun ba Eiffel tower no harii mós guest house atu vizitante sira ne’ebé hakarak deskansa bele deskansa iha ne’ebá.