Quinta, Dezembro 08, 2022
Total visitors: 692025

Vise-Ministra Turizmu Komunitáriu no Kultura, Inácia da Conceição Teixeira informa komunidade iha postu-administrativu Hatubuilico, munisípiu Ainaro, komesa halo okupasaun ba rai iha aredór sítiu turizmu relijiozu Santuáriu Na’i-Feto Ramelau.

Vise-Ministra Turizmu Komunitáriu no Kultura, Inácia da Conceição Teixeira informa komunidade iha postu-administrativu Hatubuilico, munisípiu Ainaro, komesa halo okupasaun ba rai iha aredór sítiu turizmu relijiozu Santuáriu Na’i-Feto Ramelau.

Ministra salienta, sira halo ona enkontru ho autoridade lokál no komunidade okupante sira, maibé laiha rezultadu tanba iha ezijénsia husi komunidade okupante nian katak rai refere komunidade nian no rai kultura.

“Ami husi diresaun jerál tenta dala hira ona ba enkontru iha ne’ebá atu rezolve problema, maibé lakonsege tanba iha ezijénsia katak rai ne’ebá komunidade nian, rai kultura nian. Entaun ita presiza intervensaun ministériu justisa nian, diretór jerál iha hela rai liur, fila mai ita tenke ko’alia fali ho terras propriedade atu hamutuk tun ba esplika ba komunidade kona-ba lei inan,”

“Tanba dalaruma ita-nia populasaun sira ladun komprende lei, entaun sira gosta ba okupa fatin hanesan agora dadaun akontese ne’e,” nia hateten iha servisu fatin Farol, Díli.

Nia hateten sosializasaun lei importante tebes ba komunidade atu iha koñesimentu ba lei inan ne’ebé hateten katak rai hotu iha territóriu nasionál ne’e rai estadu nian, kada governasaun mai jere rai sira ne’e uza ba nesesidade povu nian.

“Agora dadaun ami iha prosesu ida husik hela fó ba parte kompetente sira atu haree asuntu ida ne’e. Ne’e la’ós problema ki’ik, ne’e problema bo’ot tanba to’o programa eventu festival kultura nian ne’ebé loloos iha Ramelau tenke muda fali ba Ataúro,” nia hateten.

Nia hatutan kestaun okupasaun rai ne’e problema bo’ot ne’ebé akontese dadaun iha rai laran no sai mós obstáklu ida ba dezenvolvimentu ekonomia nasionál tanba investór la brani loke investimentu iha rai laran.

Antes ne’e, Prezidente Repúblika, José Ramos Horta, liuhusi video mensajen ba loron mundiál turizmu, ne’ebé monu iha loron 27 fulan Setembru tinan 2022, apelu ba governu atu rezolve problema okupasaun ilegál iha Santuáriu Ramelau.

Nia dehan sidadaun sira tenke kolabora ho governu atu dezenvolve setór turizmu tanba komunidade mak sei hetan benefísiu barak liu, bainhira indústria turizmu la’o di’ak.

“Sidadaun mak benefísiu liu ba turizmu, maibé sidadaun la kolabora entermus meu ambiente, seguransa entaun ita bele ko’alia tinan bailoron no tinan-tinan ba reuniaun oioin, maibé turizmu la avansa,” nia hateten.

Nia hateten turizmu ne’e indústria ida ne’ebé nia sanak barak inklui ambiente, seguransa, saúde publika tanba ne’e tenke rezolve sanak sira ne’e molok halo promosaun sítiu turístiku sira ne’e ba liur.