Sexta, Dezembro 09, 2022
Total visitors: 692386

Diretór Ezekutivu Centro Nacional Chega, I.P, Hugo M. Fernandes hateten sira identifika ona sítiu históriku ba destinasaun turístika hamutuk 120 iha munisípiu 12 inklui Rejiaun Administrativu Espesial Oe-Cusse Ambeno (RAEOA).

Diretór Ezekutivu Centro Nacional Chega, I.P, Hugo M. Fernandes hateten sira identifika ona sítiu históriku ba destinasaun turístika hamutuk 120 iha munisípiu 12 inklui Rejiaun Administrativu Espesial Oe-Cusse Ambeno (RAEOA).

Diretór Fernandes salienta sítiu históriku sira ne’e iha relasaun ho violasaun direitu-humanu nian, ne’ebé tenke dezenvolve liu-liu tau plaka nu’udar destinasaun turístika.

“Iha Díli, karik imi la’o ba mai haree plaka sira ne’ebé mak ita tau iha uma sira ne’e nu’udar destinasaun turístika nian. Fatin sira ne’e sítiu históriku ho intensaun ita tau plaka sira ne’e para ema turista sira bele ba haree hatene direitamente la presiza ema atu esplika ba sira,” nia hateten iha servisu fatin Balide, Díli.

Nia dehan sítiu históriku sira ne’e barak, liu-liu iha munisípiu sira seidauk tau plaka tanba seidauk hetan atribuisaun statutu juridiku no limitasaun orsamentu ba plaka nian.

Nia hateten dadaun ne’e sira submete ona proposta ba Ministério Ensino Superior, Ciência e Cultura (MESCC) atu hetan atribuisaun estatutu jurídiku ba sítiu históriku 19 hodi hetan aprovasaun nu’udar sítiu históriku oficialmente governu Timor nian.

Iha parte seluk, Prezidente Conselho de Imprensa (CI), Virgilio da Silva Guterres hateten sira servisu hamutuk ho CNC no autoridade munisípiu sira atu identifika sítiu históriku turistíku sira, liu-liu fatin sira ne’ebé iha relasaun ho jornalista sira nia mate iha períodu luta libertasaun nasionál hanesan trajédia Balibo Five no seluk tan.

Nia dehan iha postu administrativu Balibo munisípiu Bobonaro, sítiu históriku sira hanesan uma ne’ebé jornalista na’in-lima husi Austrália hela ba durante hala’o sira-nia knaar iha Balibo no uma ne’ebé militár Indonézia sunu sira-nia isin to’o motuk sai nu’udar sítiu históriku ba destinasaun turístika ne’ebé tenke prezerva.

“Promosaun ita kontinua halo tanba agora komemorasaun ita halo tinan-tinan, maibé lansamentu loron liberdade imprensa foin tinan ida ne’e katak tinan oin ita garantia partisipasaun maluk sira husi estranjeiru, liu-liu sira husi Austrália, Nova Zelándia no Holanda,” nia hateten.