Quinta, Dezembro 08, 2022
Total visitors: 692025

Iha ámbitu selebrasaun loron mundiál aihan, iha loron 16 fulan Outobru tinan 2022 foin liuba, peskizadór agrikultura, iha organizasaun Lao Hamutuk, Mariano Ferreira hateten governu tenke muda ona polítika produsaun ne’ebé orienta ba diversifika produtu aihan atu sidadaun sira bele iha asesu ba aihan ne’ebé sufisiente no nutritivu.

Iha ámbitu selebrasaun loron mundiál aihan, iha loron 16 fulan Outobru tinan 2022 foin liuba, peskizadór agrikultura, iha organizasaun Lao Hamutuk, Mariano Ferreira hateten governu tenke muda ona polítika produsaun ne’ebé orienta ba diversifika produtu aihan atu sidadaun sira bele iha asesu ba aihan ne’ebé sufisiente no nutritivu.

Nia dehan tinan barak ona governu nia polítika produsaun foku de’it ba hasa’e produsaun hare no batar, tanba ne’e demanda konsumu nasionál bo’ot liu mak fós kuaze tonelada rihun atus ida tolunulu (130,000) kada tinan.

“Ami sempre rekomenda oinsá diversifika produsaun atu la depende de’it ba konsumu fós no batar. Ita-nia rai tetuk atu kuda de’it hare labele konsege responde ba demanda ne’ebé bo’ot tebes, no ita iha produtu sira seluk ne’ebé mak to’o ohin loron abandona la fó prioridade hasa’e produsaun,” nia hateten liuhusi konferénsia imprensa iha Farol, Díli.

Nia hateten tinan-tinan governu foku ba hasa’e produsaun hare, maibe realidade produtividade produsaun la bo’ot no produsaun iha deit tonelada 7,000, ne’ebé labele koresponde hotu ba nesesidade tanba ne’e tempu ona atu fo prioridade mos hasa’e produsaun aihan sira seluk.

Mariano Ferreira hatutan dadus hatudu populasaun sei 36% enfrenta inseguransa aihan krónika, labarik idade tinan lima mai kraik 47% sofre malnutrisaun krónika raes badak. No problema sira ne’e struturál presiza intervensaun multisetorál.

Enkuantu Koordenadór Rede HASATIL, Gil Boavida husu governu atu limita importasaun produtu aihan sira ne’ebé la saudável tanba seidauk iha laboratóriu própriu atu halo teste kualidade molok distribui ba merkadu.

“Ami nia ezijénsia mak tenke ona estabelese laboratóriu ne’ebé uza halo teste ba aihan importadu, nune’e distribui mós distribui aihan sira ne’ebé saudável ba ita-nia ema. Ita dehan atu dignifika ita-nia povu, entaun aihan ne’ebé sirkula iha ita-nia rai laran mós tenke saudável labele fós ne’ebé dehan 15% aat mós ita sei promove no fahe nafatin ba ita-nia ema sira,” nia hateten.

Iha parte seluk, Diretór Nasionál Agrikultura no Hortikultura, iha Ministériu Agrikultura no Peskas (MAP), Lucio Romeu Ribeiro rekoñese seidauk iha sistema data-base ba produsaun rai laran tanba ne’e laiha dadus klaru kona-ba produsaun kada tinan nian ba produtu hortikultura.

“Agora dadaun ita iha hela preparasaun formasaun ba tékniku sira atu instala data-base atu nune’e tinan sira oin mai ita bele iha dadus ne’ebé apropriadu hasai ba publiku kona-ba produsaun,” nia hateten.

Nia hateten governu nia prioridade diverfisika produsaun aihan atu povu bele iha asesu ba produtu aihan sira ne’ebé nutritivu iha merkadu.