- Publika iha: 21 Junho 2022
Ministru Turizmu Komérsiu no Indústria, José Lucas do Carmo da Silva afirma implementasaun programa Cesta Bazika faze daruak tinan 2022, sidadaun sira ne’ebe ho salariu mensal liu $500 dolar Amerikanu, sei la hetan distribusaun pakote aihan no produtu ijiene.
Nia esplika iha uma kain ida, xefe familia nia salariu mensal liu $500 mak sei la hetan pakote aihan, maibe membru familia seluk hanesan fen no oan sira hetan pakote aihan inklui pakote ijiene pesoal ho montante osan $50 dolar Amerikanu kada individu.
“Programa cesta bazika daruak ne’e, produtu sira mai husi produtu rai laran ou produtu lokal. Nune’e mos produtu balun mai husi rai liur, kuandu produtu rai laran la sufisiente. Produtu importasaun sira mak hanesan masin midar, produtu mina tein, produtu ijiene deterzen, sabunete sira, ita konsidera mai husi liur,” nia hateten hafoin partisipa serimonia lansamentu programa cesta bazika faze daruak iha Aldeia Bairo Leste, Suku Komoro, Munisipiu Dili.
Nia dehan produtu alimentar ne’ebe benefisiariu sira hetan kompostu husi karbonhidratu mak foos, batar, feuk. Proteina mak Manutolun, Koto, Fore. Vitamina mak Modotahan sira no aifuan sira.
Nia hateten programa ne’e implementa bazea ba dekretu lei numeru 10/2022, no diploma konjunta lubuk ida inklui lista tabela presu produtu lokal iha nivel nasional no munisipiu nian tanba kompromisiu husi politika ne’e atu sosa produtu lokal 75%.
Nia informa tuir dadus nasional husi Minsiteriu Administrasaun Estatal (MAE), total benefisiariu hamutuk 1.4 milliaun ho total orsamentu ne’ebe alokadu ba programa cesta bazika faze daruak ne’e hamutuk $80,000 dolar Amerikanu.
Enkuantu, Xefe Suku Komoro, Eurico da Costa de Jesus hateten dadus levantamentu sosio ekonomia hatudu total populasaun hamutuk 31,380, maibe iha balun ne’ebe foin halo transferensia tanba ne’e bele atinji 43,000.
“Lista ami simu husi MTCI, sira ne’ebe salariu liu $500, ami halo hela divizaun ba aldeia 14 ne’e total ema hamutuk 1500 mak ho salariu bo’ot, entau ema sira ne’e la hetan,” nia hateten.
Nia hateten tuir lei kada ema ida hetan pakote aihan no pakote ijiene pesoal ho montante $50 dolar Amerikanu, entau iha familia ida ema nain 9 multiplika ba $50 ne’e hetan $450 dolar Amerikanu tanba ne’e sasan ne’ebe sira hetan mos tenke koresponde ba montante ne’e.
Iha parte seluk, Benefisiariu, Manuel Fernando Marques prefere liu governu fo subsidiu osan, duke pakote aihan tanba esperensia faze dahuluk pakote aihan ne’ebe sira hetan la koresponde ba montante osan ne’ebe governu tau $50 dolar kada ema ida.
“Lolos ne’e fo osan diak liu, maibe buat ne’e governu nia orientasaun fo mai ami simu,” nia hateten.