- Publika iha: 04 Maio 2022
Presidente Autoridade Nasional Agua no Saneamentu Institutu Publiku (ANAS, IP), Domingos Pinto hateten sira servisu hamutuk ho Ministeriu da Saúde no Organizasaun Mundial Saúde atu melhora no reforsa servisu kontrolu kualidade bee moos iha rai laran tanba bee ne’ebe kualidade ladiak fo impaktu ba saúde publika ema nian.
“Ita iha ona lei lubuk ida, maibe seidauk sufisiente no barak mak seidauk implementa tanba ne’e ANAS, IP mai hahu hanoin implementa lei sira iha setor bee no saneamentu nian, hanesan agora dadaun iha Dili ita husu BTL, EP hahu implementa dekretu lei numeru 31/2020 konaba kontrolu kualidade bee,” nia hateten hafoin partisipa iha workshop validasaun dadus analiza global ba bee no saneamentu iha Salaun Palacio da Sinzas Caicoli, Dili.
Nia hateten sira nia observasaun nota katak kondisaun infrastrutura sai hanesan dezafiu bo’ot ba BTL, EP atu asegura kualidade bee moos ba komunidade sira tanba ne’e presiza iha investimentu ba infrastrutura ne’ebe adekuadu hodi garantia kualidade bee ba populasaun sira.
Nia hatutan durante ne’e udan monu rai komunidade sira asesu bee merak tanba kondisaun infrastrutura la apropriadu bee husi mota tun mai loos ba komunidade sira.
Iha parte seluk, Diretur Geral Prestasaun Servisu Saúde, Iha Ministeriu da Saúde, Dra. Odete da Silva Viegas hateten saúde iha papel importante tebes atu asegura kualidade bee ba komunidade sira tanba ne’e importante tebes atu hamutuk ho ANAS, IP halao servisu kontrolu kualidade bee.
“Laos bee hotu-hotu ladiak, maibe presiza duni halo analiza ida ba bee tanba ita bo’ot sira hare katak ita nia populasaun konsumu bee ne’ebe ita iha, agora iha mos moras barak ne’ebe afeta rins ne’e liga ho kualidade bee ne’ebe ita iha. Ita hare moras rins laos afeta deit ema adultu maibe labarik sira mos entau ita hare buat ruma ita tenke hare liu-liu kualidade bee,” nia hateten.
Nia apresia ANAS, IP iha ona komitmentu atu halo investimentu ba infrastrutura no ekipamentu laboratoriu nian hodi bele halo peskiza no analiza ba kaulidade bee sira ne’ebe populasaun sira konsumu.