- Publika iha: 26 Fevereiro 2013
Atu motiva sidadaun hotu mantein sira nia bairo ne’ebe moos no saudavel, Ministeriu Administrasaun Estatal sei halo kompetisaun suku limpu ba sukus hotu iha Distritu Dili.Ministru Administrasaun Estatal (MAE), Jorge da Conceicao Teme dehan objetivu husi kompetisaun ba sukus 32 iha Distritu Dili ne’e, oinsa mak atu suku idak-idak sai inimigu ba lixu hodi hamoos sira nia bairo.
“Labele sai namora fali ho lixu,selingkuh fali ho lixu ida ne’e problema,” hateten Ministru Estatal,Jorge da Conceicao Teme,iha Parlamentu,(07/02).
Ministru Teme hatutan, oras ne’e dadaun ministeriu prepara ona ekipa ida atu halo peskiza kona ba attitude no karakter moris iha sidade kona ba lixu oinsa.
“Estudus ne’e ami sei kopera ho UNTL, nia alvu primeiru mak ba feto sira tanba feto mak koa na’an iha kuzinha,feto mak koa modo,feto mak koa talas,aifarina,loke supermi para tein, se ita nia inan feto sira iha mentalidade disiplinadu kona ba lixu ne’e bele pengaruh ita mane mais enkuantu feto sira mak iha oin para soe arbiru lixu entaun ita mane pior liutan,” Ministru Teme katak.
Enkuantu kona ba rezultadu ba kompetisaun ne’e, Ministru dehan sei anunsia iha selebrasaun loron independensia 20 de Maiu tinan ne’e. “husi sukus 32 ne’e, se mak sai vensedor,”.
Entretantu Deputadu Aurelio Freitas Ribeiro konkorda ho kompetisaun ida ne’e, nune’e bele motiva komunidade hotu atu hamoos sira nia sukus.
“Maibe labele hein deit bainhira halo kompetisaun mak ita servisu kuandu ita laiha kompetisaun ita husik hela deit,” dehan Deputadu ne’e.
Tuir observasaun Deputadu ne’e nian katak, komunidade balun iha konsiensia rasik hamoos iha nia uma sorin no estrada ninin maibe husik hela deit kareta la ba tula.
“Ne’e mos hanesan laos atu motiva ema atu badinas ba limpeza maibe halo ema sai baruk tiha deit,” dehan Deputadu Ribeiro.
Iha fatin hanesan Deputada Maria Lurdes Bessa apoia no konsidera programa ida ne’e kapas hodi sensibiliza komunidade hotu-hotu kona ba impaktu lixu ba ema nia saude.
“Hau senti ne’e kapas tebe-tebes maibe hau so bolu atensaun mak ne’e wainhira halo ona planu ida hanesan ne’e tenki preve katak komunidade hamos iha nia Bairo tenki Kareta iha para tula,” Deputada Bessa sujere.