Quarta, Janeiro 19, 2022
Total visitors: 600398

Inspektur Geral, Iha Autoridade Inspesaun no Feskalizasaun Atividade Ekonomika no Alimentar Institutu Publika (AIFAESA, I.P), Ernestu Monteiro hateten governu presiza halo investimentu bo’ot atu kria kondisaun laboratoriu ne’ebe apropriadu no rekursu humanu espesializasaun atu bele halao servisu kontrolu kualidade produtu ai-han tantu lokal no importadu hodi garantia konsumedor sira iha asesu ba produtu ai-han ne’ebe seguru no kualidade ba saúde.

Inspektur Geral, Iha AIFAESA, I.P, Ernestu Monteiro hateten governu presiza halo investimentu bo’ot atu kria kondisaun laboratoriu ne’ebe apropriadu no rekursu humanu espesializasaun atu bele halao servisu kontrolu kualidade produtu ai-han.

Nia dehan servisu kontrolu produtu ai-han iha merkaduria lao hela, maibe atu prova produtu ai-han sira ne’ebe konsumedor sira asesu seguru la fo impaktu ba saúde publika ema nian tenke liu husi teste laboratoriu.

“Ate agora ita seidauk iha lei ida konaba estandar nasional hanesan iha rai seluk ema nia produsaun nasional iha padraun, ne’e ita hotu parte husi akademiku no ministeriu relevante sira atu hamosu standar nasional ida hodi asegura no kontrola produtu sira ne’ebe iha ita nia rai,” nia hateten bainhira partisipa iha seminar ho tema Garantia Ai-han Seguru Agora Atu Ema Hotu Bele Saúdavel iha Loron Aban, iha salaun Delta Nova Comoro, Dili.

Nia dehan padraun nasional ne’e hanesan kualidade minimu ne’ebe nasaun tenke iha atu bele guia servisu kontrolu ba produtu ai-han sira ne’ebe produs iha rai laran no sira ne’ebe tama husi rai liur mai.

Nia hatutan sira indentifika ona rai iha parte Hera, hodi harii laboratoriu proprio ba servisu kontrolu ai-han, no sira hato’o ona proposta balun ba iha parseru dezenvolvimentu sira atu apoia ba estabelesementu laboratoriu hodi haforsa servisu kontrolu ba kualidade ai-han ne’ebe komunidade konsumu.

Iha parte seluk, Diretor Nasional Saúde Publika, iha Ministerio da Saúde, Carlito Correia hateten prevalensia moras kronika lahada’et sira aas hanesan komunidade barak sofre moras kardiovaskular, rins, kankru, diabetes meletus tanba konsumu ai-han sira ne’ebe kontaminadu ho substansia kimiku no toksina.

Nia dehan moras komun ne’ebe rejista makas iha fasilidade saúde sira mak moras diarea tanba konsumu ai-han sira ne’ebe kontaminadu husi bacteria.

“Ita nia rai sempre akontese beibeik evenenomentu ou hahan lanu iha fatin barak hanesan akontese iha serimonia kultura sira lia mate no festa sira no iha mos hahan sira ne’ebe la seguru ba ema nia saúde bele lori moras diarea,” nia hateten.

Nia hateten ai-han ne’ebe seguru mak ai-han sira ne’ebe eskolha no prepara rasik, kompara ho ai-han sira ne’ebe asesu iha restorante no vendedor ai-han iha dalan ninin sira ne’e risku bo’ot tanba posibilidade kontaminasaun bo’ot tebes.

Tuir dadus informasaun ministerio da saúde, iha tinan 2019, ema 94,794.00 mak sofre moras diarea no balun lakon vida tanba konsumu ai-han laseguru. No iha tinan 2016-2020, ema nain 293 mak hahan lanu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04