Quarta, Janeiro 19, 2022
Total visitors: 600398

Parlamentu Nasional (PN) aprova ona proposta lei Orsamentu Jeral do Estadu OJE 2022 iha espesialidade ho montante $2,770.680 hodi aumenta salariu ba lideransa komunitaria kompostu husi Xefe Suku no Xefe Aldeia kada fulan.

Parlamentu Nasional (PN) aprova ona proposta lei Orsamentu Jeral do Estadu OJE 2022 iha espesialidade ho montante $2,770.680.

Vise Prezidente PN, Angelina Sarmento, hateten parlamentu aprova proposta ho numeru 55 ne'ebe mak propoin husi ministeriu estatal iha faze espesialidade hodi aumenta salario xefe suku nian ba $250, no ba xefe aldeia $150 kada fulan.

"Ho proposta lei ne'e ita aprova hodi hasa'e salariu ba xefe suku no xefe aldeia iha Timor laran tomak," nia dehan.

Nia dehan, antes ne'e salariu kada fulan ba xefe suku $140 sae ba $250, xefe aldeia $100 sae ba $150, no iha tinan 2022 ne'e salariu kada fula hasa'e ona.

“Proposta numeru 55 bele valoriza ita-nia lider Komunitaria sira dezde 2003 instala konsellu too ohin loron dala barak ita sente sira mak hamutuk ho povu no kualker Governu ida tun sira mak atende, nune’e merese tau duni osan subsidiu aumenta ho valorizasaun oinsa hakbiit nia servisu diak liutan,” Deputadu Antoninho Bianco, hateten iha Plenariu Parlamentu Nasional.

Nia hatutan, proposta ne’e hametin estrutura baze konsellu suku hodi servisu hamutuk ho Governu lori dezenvolvimentu nasaun nian.

Enkuantu nia dehan, lha territoriu nasional, xefe suku sira hamutuk 452 hosi suku 452, xefe aldeia 2,233, pesoal apoiu administrasaun suku 452, delegadu ka delegada no lia-nain 5,822 iha territoriu tomak inklui Rejiaun Administrativa Espesial Oe-Cusse Ambeno (RAEOA).

Entretantu, Ministru Administrasaun Estatal (MAE), Miguel Pereira de Carvalho, hateten bainhira membru konsellu suku eleitu iha 2004 hahu ho subsidiu sira ho valor $15, ho alterasaun subsidiu akontese iha 2012 no halo revizaun iha tinan 2014 konsegue hasai insentivu subsidiu ba xefe suku sira ho $140, no to’o agora halo ona tinan hitu tempu ona presiza hasa’e insentivu ba lideransa komunitariu sira.

“Tan ne’e, ha’u hanoin ministeiru konkorda atu hasa’e insentivu xefe suku, xefe aldeia no estrutura suku,” nia hateten.

Tanba ne'e nia dehan, hahu tinan 2022 lideransa komunitaria nia salariu hasae ona kada fulan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04