Quarta, Setembro 22, 2021

Membru Parlamentu Nasional, Deputada Veneranda Lemos kestiona kondisaun fatin izolamentu munisipiu Baucau nian, ne’ebe la dignu atu akumula sidadaun sira ne’ebe konfirmadu hetan infesaun Covid-19 tanba fatin foer no laiha haris fatin.

Membru Parlamentu Nasional, Deputada Veneranda Lemos kestiona kondisaun fatin izolamentu munisipiu Baucau tanba fatin foer no laiha haris fatin.

“Iha fatin izolamentu ne’ebe governu halo iha stadiu Baucau nian. Depois halo swab test ba ema nain 186 identifika nain 64 mak positivu, Maibe kondisaun iha fatin ne’eba ladignu, haris fatin laiha. Ema moris deit iha foer nia leten no hahan ne’ebe fo ba sira mos ladiak, ne’e informasaun ne’ebe autoridade sira hato’o mai,” nia hateten iha plenaria parlamentu, Dili.

Nia ejiji governu atu tau atensaun ba sidadaun sira ne’ebe iha fatin izolamentu sira, liu-liu sira nia hahan no ijiene atu sira labele hetan kondisaun saúde ne’ebe grave liu tan.

Nia hateten triste hare kondisaun actual tanba estado hola desizaun politika aplika estado emergensia durante tinan ida resin ona, aplika mos medida serka sanitaria no konfinamentu domisiliariu halo povu barak terus, maibe numeru kazu aumenta makas no ema mate mos barak ona.

Iha parte seluk, Ministra da Saúde, Dra. Odete Maria Freitas Belo hateten inisiu deteta kazu governu propoin halo servisu prevensaun, maibe sidadaun sira la kumpri regras protokolu prevensaun lori konsekuensia ne’ebe ema hotu tenke simu.

“Agora ita tenke simu nia konsekuensia tanba ita rasik la lao tuir protokolu sira ne’ebe iha.

Hau hatene fatin espasu laiha, maibe dadaun ne’e ita sei nafatin iha fatin akomoda ema sira. Maske fatin sira ne’e laos iha hospital, maibe ami buka espasu hodi estabelese fatin apropriadu hodi responde ba pasiente moderadu no grave sira,” nia hateten.

Nia dehan fundu Covid-19 aloka $16 milhoens hodi sosa vasina, maibe vasina doasaun sira sufisiente ona atu fo ba populasaun elejivel sira tanba ne’e orsamentu ne’e uza hodi sosa fali ekipamentu mediku sira no logistika sira atu tau iha fatin izolamentu sira.

Nia hateten sira mos hato’o ona pedidu ba Organizasaun Mundial Saúde no governu Australia atu loke rekrutamentu ba profesional saúde sira hodi apoia ekipa saúde nasional tanba numeru kazu hospitalizasaun aumenta makas.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04