Quarta, Setembro 22, 2021

Diretur Executivu Servisu Registo no Verifikasaun Empresarial (SERVE), Florêncio Sanches hateten depois governu introdus politika cesta bazika numeru empreza foun ne’ebe registu iha sistema aumenta makas, no barak halo alterasaun ba atividade husi faan roupa ba fornese aihan lokal.

Diretur Executivu Servisu Registo no Verifikasaun Empresarial (SERVE), Florêncio Sanches hateten depois governu introdus politika cesta bazika numeru empreza foun ne’ebe registu iha sistema aumenta makas.

Nia salienta politika positivu sira ne’e tenke kontinua atu bele iha sustentabilidade ba atividade ekonomia sira ne’ebe lao hela hodi kontribui mos ba hadia ekonomia rai laran liu husi selu taxa.

“Husi SERVE nia hare programa cesta bazika eleva tebes numeru empreza, tanba normalmente kada fulan ami halo registu ba empreza 200 resin, maibe depois programa ne’e sa’e 200% ou 800 empreza foun. No ida fali kontribui ba alterasaun ba empreza ezistensia sira, katak uluk sira faan roupa depois cesta bazika sira altera atividade fornesementu aiha produtu lokal ne’ebe politika ne’e husu,” nia hateten hafoin partisipa iha lansamentu relatorio monitorizasaun membru Forum NGO Timor-Leste nian konaba programa cesta bazika, iha salaun FONGTIL Kaikoli, Dili.

Nia konsidera situasaun ida ne’e nunka akontese iha passadu, entau programa cesta bazika finaliza ona, maibe espera governu iha programa seluk atu produtu lokal nafatin iha folin iha sosiedade nia let.

Nia hateten baze dadus registu komersial iha Timor-Leste, total empreza ne’ebe registu hamutuk 35 mil resin. Maibe 40% deit maka kontribui taxa 10% ba kofre estado no 60% empreza ki’ik sira ne’ebe hasoru limitasaun oioin asesu ba programa sira governu nian hodi dezenvolve atividade negosio.

Nia hatutan governu presiza hadia legislasaun sira no dezenvolve politika ne’ebe diak hodi apoia empreza ki’ik sira 60% iha teritorio nasional sai kompanha mediu no bo’ot maka sei kontribui taxa ba kofre estado bo’ot tuir mehi ne’ebe governu iha.

Entretantu, Diretur Executivu Centro Logistika Nasional, Jacinto Paijo hateten governu iha komprimisio atu redus dependensia produtu importasaun, liu husi fo prioridade sosa produtu lokal tanba ne’e programa cesta bazika bele remata, maibe sosa produtu lokal nafatin lao.

“Programa ne’e motiva Timor oan sira halo negosio tanba situasaun ida ne’e halo limitasaun ba importasaun, entau oportunidade ba Timor oan sira atu halo investimentu ba iha setor produtivu,” nia hateten

Nia hateten tinan naruk, Timor-Leste depende ba produtu importasaun, maibe ho surtu mundial Covid-19 ejiji governu atu dezenvolve politika no programa ne’ebe diak hodi motiva agrikultor sira hasa’e produsaun rai laran.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04