- Publika iha: 17 Agosto 2021
Sekretariu Estadu Protesaun Sivil (SEPS) iha ona dekretu lei hodi kriminaliza komunidade ne'ebe konstrui hela fatin iha area risku ba dezastre naturais inklui iha mota laran, foho lolon, no tasi ibun nune'e mos besik iha lagoa sira.
Diretor Nasional Protesaun Sivil, Superientendente Polisia Ismael Babo hateten, autoridade protesaun sivil iha ona dekretu lei numeru 12/02 Dezembru ne'ebe hetan ona aprovasaun hodi implementa lei ne'e.
"Iha lei ne'e fo kompetensia ba protesaun sivil hodi fo atensaun no kriminaliza komunidade sira ne'ebe mak kuntinua konstrui uma iha area risku ba dezastre hanesan, mota laran, foho lolon, tasi ibun no besik iha lagoa," DNPS Superientendente Babo hateten.
Nia dehan, area hirak ne'e identifika no tau hotu ona plaka hodi bandu komunidade sira atu labele halo uma iha area hirak ne'e.
"Kamunidade sira ne'ebe mak ulun to'os no la iha disiplina hodi kontra no kuntinua halo uma iha area risku, mak autoridade protesaun sivil hamrik no bazeia ba kompetensia lei hodi fo avizu mak sira la rona tenke aplika lei hodi kriminaliza," nia informa.
Tanba ne'e nia dehan karik komunidade kuntinua halo uma, protesaun sivil sei aplika desobidiensia tuir lei ne'ebe vigora no sei kriminaliza no prosesu.
"Ita kriminaliza sira ho lei numeru 12/02 Dezembru ne'e tanba ita lakoi akontese tan hanesan foi lalais akonteze dezastre naturais inundasaun ema barak mak sai vitima no barak mak lakon vida liu-liu ba sira ne'ebe mak hela iha area risku," nia dehan.
Alende ne'e nia dehan tuir dados ne'ebe sira iha komunidade ne'ebe mak oras ne'e kuntinua okupa area risku hamutuk 3,000 resin, ema hirak ne'e la autoriza tan sira atu konstrui hela fatin foun tanba governu sei muda sira husi fatin refere.
Entretantu, Ministru Admistrasaun Estatal, Miguel Pereira de Carvalho hateten, governu orienta ona autoridade lokal hodi identifika fatin ne'ebe mak bantu tanba risku ba dezastre naturais komunidade sira labele halo uma iha ne'eba.
Nia dehan area risku ne'ebe bandu komunidade sira hela mak hanesa tasi ibu, mota laran lagoa 12 de Outubru Tasi tolu, Kulu- hun besik mota ibun no Hera besik iha Naval nian.
"Area hirak ita bandu ona kaik komunidade kuntinua halo uma, Protesaun Sivil iha kompetensia hodi aplika lei numeru 12/02 de Dezembru hodi kriminaliza," MAE Pereira hateten iha Palacio do Governu.