Terça, Agosto 03, 2021

Ministru Administrasaun Estatal (MAE), Miguel Pereira de Carvalho hateten hahu loron 1 fulan Julho tinan 2021, Sekretariado Tekniku Administrasaun Eleitoral (STAE) hahu halo atendimentu resensiamentu ba eleitor foun no aktualiza base dadus ba elisaun presidensial tinan 2022.

Ministru Administrasaun Estatal (MAE), Miguel Pereira de Carvalho hateten hahu loron 1 fulan Julho tinan 2021, STAE hahu halo atendimentu resensiamentu ba eleitor foun no aktualiza base dadus ba elisaun presidensial tinan 2022.

Nia enkoraja sidadaun sira ne’ebe idade tinan 17 ona no sira ne’ebe hakarak aktualiza kartaun eleitoral atu hakbesik aan ba sentru resensiamentu sira hodi hetan atendimentu.

“Ida ne’e importante tebes tanba iha Fulan Marsu tinan oin, ita sei realiza elisaun presidensial. Governu tenke garantia sidadaun sira iha direitu ba vota, liu husi enkoraja sidadaun sira hakbesik ba sentru resensiamentu atu hetan kartaun no aktualiza sira nia dadus,” nia hateten hafoin partisipa iha serimonia lansamentu atendimentu resensiamentu eleitoral no aktualizasaun base dadus ba elisaun presidente tinan 2022, iha salaun CNE Kaikoli, Dili.

Nia dehan STAE no Comisaun Nasional Elisaun (CNE) halao ona kordenasaun ho Ministerio Negosio Estranjeiru no Koperasaun (MNEK) atu estabelese sentru resensiamentu no aktualizasaun iha estranjeiru hodi fo atendimentu ba sidadaun sira ne’ebe hela, servisu no estudu iha nasaun seluk, liu-liu nasaun Inglatera, Irlandia, Portugal, Korea do Sul no Australia.

Entretantu, Diretur Jeral STAE, Acilino Manuel Branco hateten sentru resensiamentu eleitoral no aktualizasaun lokaliza hotu iha munisipio no postu administrativu sira, maibe iha posibilidade atendimentu movel iha area sira ne’ebe komunidade difisil hetan transporte asesu ba sentru.

“Hahu semana oin ba oin ne’e, nivel munisipo no postu administrative sira hahu halo atendimentu ba resensiamentu no aktualizasaun ba eleitor sira nia kartaun atu sira bele ejerse sira nia direitu votu iha elisaun presidensial tinan 2022,” nai hateten.

Nia dehan sira iha tempu fulan ne’e, atu halo resensiamentu no aktualiza base dadus tanba iha segundu semana fulan Janeiro tinan 2022, kalendario eleitoral lao ona no prediksaun elisaun sei akontese iha fulan Marsu.

Nia informa sira rekruta ona pesoal operador sistema no asistensia teknika hamutuk 130, ne’ebe sei kolokadu iha 65 postu administrative iha 12 munisipio inklui RAEOA hodi fo atendimentu.

Iha parte seluk, Presidente Comisaun Nasional Eleisaun (CNE), Alcino Barris hateten bazea ba konstituisaun no lei numeru 6/2016, ekipa CNE sei halo feskalizasaun no supervizaun ba atividade resensiamentu eleitoral no aktualizasaun base dadus atu asegura produsaun dadus sira ne’e tuir prinsipio lei sira relasiona ho resensiamentu eleitoral nian.

“Supervizaun CNE nian dala barak nota katak problema logistika sai hanesan obstaklu ba pesoal STAE sira iha munisipio no RAEOA, bainhira halao atendimentu hanesan insufisiente kombostivel ba transporte, blanku kartaun, kapasidade internet,” nia hateten.

Alende ne’e nia dehan kriteria trata kartaun eleitoral utiliza sertidaun baptismu ne’e iha tendensia hamosu iregularidade tanba sertidaun baptismu ne’e ema hotu ne’ebe relijiaun katolika iha.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04