Terça, Agosto 03, 2021

Presidente Komisaun F asuntu saúde, seguransa sosial no Igualidade Jeneru, iha Parlamentu Nasional, Deputado Noé da Silva Ximenes husu ministerio da saúde atu aselera prosesu pagamentu subsidio alimentasaun ba akompañante pasiente sira ne’ebe halo tratamentu iha rai liur tanba fulan ida ho balun sira seidauk simu.

Presidente Komisaun F asuntu saúde, seguransa sosial no Igualidade Jeneru, iha Parlamentu Nasional, Deputado Noé da Silva Ximenes husu ministerio da saúde atu aselera prosesu pagamentu subsidio alimentasaun ba akompañante pasiente sira ne’ebe halo tratamentu iha rai liur.

Nia dehan situasaun agora ligadu ho surtu mundial Covid-19, sira presiza tebes subsidio atu aguenta sira nia moris durante hein pasiente halo tratamentu iha Indonesia no Singapura.

“Ita nia pasiente sira ne’ebe oras ne’e halo hela tratamentu iha Indonesia no Singapura, tuir informasaun ne’ebe ami simu katak sira seidauk simu sira nia subsidiu husi fulan Marsu to’o ohin loron nian.

Ami husu atu prosesu lalais hodi labele dificulta ita nia pasiente sira no sidadaun sira ne’ebe halo hela tratamentu iha fatin rua refere,” nia hateten iha plenaria parlamentu nasional, Dili.

Nia dehan pasiente sira ne’e halo tratamentu iha rai liur tanba laos sira maka hakarak, maibe kapasidade hospital nasional maka seidauk bele atu fo atendimentu ba moras ne’ebe sira sofre, liu-liu moras fuan no kankru.

Iha parte seluk, Diretor Nasional Apoio Servisu Hospitalares Interino, Doutor Nilton da Costa Cruz hateten antes Covid-19 akompañate pasiente halo tratamentu iha Singapur, sira iha direitu $25 loron ida ba alimentasaun. Maibe depois surtu Covid-19 sistema muda subsidio alimentasaun tama hotu iha pakote tratamentu nian tanba akompañate sira la sai ba liur no sira simu hahan ne’ebe oferese husi hospital.

Nia dehan sira halo tratamentu iha Indonesia, subsidio alimentasaun ba akompañate loron ida $10, ne’ebe halo pagamentu kada fulan no dala ruma atraza.

“Subsidio ba pasiente sira laos veteranu, normalmente nia prosesu sira sai husi ne’e, ita fo ona osan fulan ida nian ba sira. Agora depende ba sira nia gastus, se seidauk to’o fulan ida osan hotu ona labele fo sala ba ministerio hodi dehan fali ministerio la halo pagamentu,” nia hateten.

Nia rekonese sempre akontese atrazu pagamentu subsidio, maibe sira halo esforsu atu responde imidiata tanba ema tenke han.

Nia hateten subsidiu ne’ebe fo ne’e ba alimentasaun deit tanba kustu sira ba visa, tratamentu, alojamentu no transporte sira kobre hotu ona iha orsamentu operasional nian.

Nia informa total pasiente ne’ebe halo hela tratamentu iha rai liur, liu-liu hospital Siloam Indonesia no hospital Mount Elisabeth Singapur, to’o iha fulan Abril tinan 2021, hamutuk nain 39. Sira ne’e maioria sofre moras fuan no kankru atu halo tratamentu kemoterapia no radioterapia.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04