Domingo, Junho 20, 2021
Total visitors: 566016

Diretor Servisu Saúde Munisipio Bobonaro, João Baptista Mau Cardoso, hateten pasiente Covid-19 nain ida deside halo izolamentu individu iha uma toos nian tanba fatin izolamentu apropriadu laiha ona espasu atu akumula pasiente.

Diretor Servisu Saúde Munisipio Bobonaro, João Baptista Mau Cardoso, hateten pasiente Covid-19 nain ida deside halo izolamentu individu iha uma toos nian.

Nia dehan sira iha fatin izolamentu rua, hanesan izolamentu Mota Ain ho kama 10 no alojamentu privado ida iha sidade ho kuartu 12 atu akumula pasiente Covid-19 ho kategoria lizeira, maibe nakonu hotu ona tanba ne’e sira konvense familia sira atu hamutuk buka fatin hodi izola membru ne’ebe detetadu positivu atu labele hadae’t virus ne’e ba familia seluk no komunidade.

“Iha kazu balun sira nain hakarak ba iha sira nia uma toos, no familia sira hodi hahan ba sira. Buat sira ne’e ita halo hodi hein loron balun fatin izolamentu mamuk maka ita ba foti sira mai tau iha izolamentu,”

“Kazu ida deteta positivu, fatin izolamentu sei iha ami ho CIGC ba atu foti, nia halai lakon tiha. Iha loron 4, xefe suku kontaktu nia subar hela iha toos. Wainhira ami hatene nia hela iha toos ami atu ba foti fatin izolamentu kuartu laiha, entau mantein nia iha ne’eba ate ohin loron besik loron 9 ona,” nia hateten via telephone.

Nia dehan profesional saúde sira halo monitorizasaun nafatin ba pasiente ne’e via telephone tanba pasiente ne’e tama kategoria lizeira laiha sintomas kondisaun estavel hela.

Nia hateten ekipa saúde no CIGC munisipiu buka nafatin fatin atu halo izolamentu hanesan hotel, alojamentu ki’ik sira, no fatin publiku hanesan eskola sira, maibe problema maka fatin privado sira ne’e barak laiha dokumentu kompletu no besik liu komunidade sira nia uma.

Nia hatutan sira mos hetan autorizasaun husi servisu edukasaun munisipiu atu utiliza eskola sira ba izolamentu, maibe problema laiha ekipamentu hanesan kama no kulsaun.

Nia informa movimentu illegal iha frontera trestre menus tebes, kuaze semana rua ema nain ida tanba ema husi Atambua-Indonesia mos tauk ona mai Timor, maibe kada semana iha loron kuarta frontera loke atu kareta sira transporta sasan ne’e tama.

Tuir dadus komulativu Covid-19 iha Timor-Leste, husi loron 21 fulan Marsu tinan 2020, to’o loron 24 fulan Maio tinan 2021, total kazu konfirmadu iha Munisipio Bobonaro hamutuk 99. Husi numeru ne’e nain 25 rekuperadu ona no nain 74 ativu hetan akompanhamentu husi profesional saúde sira iha sala izolamentu.

Iha parte seluk, Membru Parlamentu, deputado Dario Madeira preokupa ho evolusaun surtu Covid-19 iha teritorio nasional tomak, ne’ebe taxa insidensia sa’e makas, maibe kapasidade infrastruktura, liu-liu fatin izolamentu atu akumula pasiente sira laiha ona.

“Iha Munisipio Viqueque, iha loron 12, kuandu governu hakotu serka sanitaria kazu aumenta makas, ne’ebe halo uma polo universidade nian nakonu, no okupa tan residensia administrador nian,” nia hateten.

Iha oportunidade ne’e, nia husu ba jestor servisu saúde munisipio atu orienta ajente saúde sira hotu ho diak no halo tratamentu ne’ebe dignu ba sira hodi bele hamutuk halo servisu responde ba surtu Covid-19 no moras seluk tanba dadaun ne’e hospital sira mamuk ema tauk mai hospital.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04