Segunda, Maio 17, 2021

Diretur Servisu Saúde Munisipio Lautem, Bernardo Amaral Lopes hateten kazu konfirmadu positivu Covid-19 dalahuluk sira halo evakuasaun mai iha capital Dili, maibe agora numeru kazu aumenta beibeik tanba ne’e sira deside utiliza fatin alojamentu privado hodi halo izolamentu ba pasiente sira atu bele hetan observasaun husi profesional saúde sira.

Diretur Servisu Saúde Munisipio Lautem, Bernardo Amaral Lopes hateten kazu konfirmadu positivu Covid-19 dalahuluk sira halo evakuasaun mai iha capital Dili, maibe agora numeru kazu aumenta beibeik.

Nia salienta total kazu konfirmadu hamutuk ona nain 12, no kazu sira ne’e esporadiku tanba kazu sira ne’e detetadu husi sidadaun sira ne’ebe halo viajen husi Dili ba Lautem.

“Ami autoriza tama iha Lautem ho kondisaun rua maka ida tama livre ba familia ho kontrolu, no seluk obrigatoriu tama kuarentina. Tama livre ba familia ne’e ba sira ne’ebe hetan autorizasaun husi Centru Integradu Gestão Crize ho aneksu rezultado teste PCR negativu ho durasaun labele liu loron tolu. Sira ne’ebe tama la ho autorizasaun CIGC, maibe rezultado teste PCR negativu liu ona loron tolu obrigatoriu tama kuarentina,” nia hateten via telefone.

Nia hateten ekipa taskforce deside rezultadu teste labele liu loron tolu tanba kazu dahuluk hetan autorizasaun husi CIGC, maibe depois to’o Lautem teste positivu no kazu ida seluk teste negativu iha Dili ba Lautem teste fali positivu tanba rezultado teste fo sai loron tolu liu.

Nia hateten dadaun ne’e sira utiliza fasilidade publiku Polo Universidade nian atu halo konfinamentu obrigatoriu ba sidadaun sira ne’ebe tama la prense kriteria hanesan rezultado teste liu ona loron tolu no la ho autorizasaun husi CIGC.

Nia hatutan projetu konstrusaun ba fatin izolamentu lao hela foin atinji 20%, entau sira nia planu identifika hela fatin publiku sira balun atu bele prepara ba izolamentu, wainhira situasaun dezkontroladu.

Nia informa total sidadaun iha konfinamentu dadaun hamutuk nain 100 resin no pasiente ne’ebe ativu hetan tratamentu iha fatin izolamentu nain 8 ho kategoria lizeiru.

Iha parte seluk, Diretur Nasional Orsamentu no Gestão Finansas, iha Ministerio da Saúde, Miguel Maria hateten total projetus ne’ebe iha ligasaun ho servisu prevensaun no mitigasaun surtu Covid-19 hamutuk 284 inklui konstrusaun ba fasilidade izolamentu iha munisipio sira.

Nia dehan projeitu sira kona ba konstrusaun fatin sira iha munisipio ne’e lao hela, maioria seidauk konklui.

“Iha 50 resin CPV maka iha hela ministerio finansas sentral atu prosesu ba kapagamentu. Sira ne’e maioria ba servisu fornesedor hahan sira nian tanba sira fo ona servisu sira ne’e,” nia hateten.

Nia dehan total orsamentu ne’ebe alokadu ba servisu Covid-19 nian husi Fundu Covid-19 ho monante $25 miloens. Osan sira ne’e inklui mos harii fatin izolamentu sira iha munisipio.

Nia hatutan iha orsamentu ratifikativu tinan 2021, ministerio da saúde propoin tan $34 miloens atu responde deit ba servisu prevensaun no mitigasaun surtu Covid-19, liu-liu harii fasilidade izolamentu no kuarentina.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04