Domingo, Maio 16, 2021

Nain kompanhia Restorante Felicia Queen Unip. Lda, emprezaria Felicia Araújo hateten sira presiza osan cash atu sosa produtu alimentar hodi prepara ba sidadaun sira iha fatin kuarentina, izolamentu no ekipa liña frente sira tanba ne’e pagamentu atrazu fo implikasaun makas ba servisu fornesementu aihan nian.

Nain kompanhia Restorante Felicia Queen Unip. Lda, emprezaria Felicia Araújo hateten sira presiza osan cash atu sosa produtu alimentar hodi prepara ba sidadaun sira iha fatin kuarentina, izolamentu no ekipa liña frente sira.

Nia salienta wainhira governu tarde halo pagamentu ba sira, maka sira tenke halo imprestimu ba instituisaun finanseiru sira atu nafatin halao servisu fornese hahan ba maluk sira iha kuarentina no izolamentu tanba ema presiza han lorloron.

“Restorante ne’e, ita hasai uluk osan hodi ba sosa sasan, ita nunka atu deve ema nia sasan tantu iha supermerkadu no merkadu tradisional sira tenke selu cash. Entaun ita tenke iha osan atu fornese hahan tanba ema iha kuarentina la interese ami hetan ona pagamentu ou lae, sira hatene maka hetan hahan dader, meudia no kalan. Tanba ne’e ami husu sistema balun tenke muda hodi aselera pagamentu atu ajuda kompanha sira,” nia hateten iha servisu fatin Tais Market Colmera, Dili.

Nia dehan durante ne’e sira halo imprestimu iha instituisaun finanseiru sira ho jurus husi 10% to’o 15%, maibe situasaun agora difisil atu hetan fiar husi instituisaun finanseiru sira tanba rendimentu menus tebes.

Nia hateten iha tinan kotuk 2020, sira iha kontratu ho governu ho montante orsamentu kuaze $100,000 resin, maibe metade seidauk halo pagamentu. No iha tinan 2021, sira iha kontratu ho governu ho montante $50,000 atu fornese hahan ba fatin kuarentina no ba pesoal liña frente sira ne’ebe halao servisu prevensaun no mitigasaun surtu Covid-19.

Nia informa sira fornese hahan ba sidadaun sira iha fatin kuarentina Hotel Colmera, Hotel Timing, no sira mos fornese hahan ba professional saúde sira iha Laboratoriu Nasional, Hospital Nasional Guido Valdares, inkui mos Ministerio da Saúde.

Iha parte seluk, Diretur Nasional Aprovisionamentu, iha Ministerio da Saúde, Nelson Guterres Castro rekonhese pagamentu ba kompanhia fornesedor hahan no alojamentu seidauk hotu, maibe governu sei selu hotu.

Nia dehan pagamentu atrazu oituan tanba tenke lao tuir sistema no birokrasia ne’ebe naruk atu bele hare didiak no verifika dokumentu sira hotu antes halo pagamentu.

“Pagamentu ne’e parsial, entaun sira hatama sira nia recivu mai ita prosesu halo pagamentu. Entau servisu ne’e lao nafatin,” nia hateten.

Nia dehan orsamentu ne’ebe alokadu halo pagamentu ba kompanhia fornesedor hahan sira hahu tinan 2020 to’o agora hamutuk $2 milhoens resin. Husi montante ne’e balansu seidauk halo pagamentu kuaze $300,000.

Nia hateten dificuldade ne’ebe sira hasoru maka, dadaun ne’e oficial finansas no aprovizionamentu barak maka afetado Covid-19 tanba ne’e servisu balun atrazadu, maibe nafatin halo esforsu atu aselera prosesu sira ne’e.

Nia informa total kompanhia ne’ebe halao servisu fornese hahan ba fatin kuarentina no izolamentu sira hamutuk 9 maka kompanhia Reginaldo Unip, Lda, kompanhia Roof Casa Musica, Unip, Lda, kompanhia Kaimaleria Unip.Lda, kompanhia Helfia Unip. Lda, kompanhia Felicia Queen Unip. Lda, kompanhia Sara Unip. Lda, kompanhia Montez Frere Unip. Lda, kompanhia LFLFF Araujo Unip. Lda, no kompanhia Tropikal Unip. Lda.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04