Segunda, Maio 17, 2021

Ministra Negosiu Estranjeiru Nova Zelandia, Nanaia Muhata anunsia ona katak governu Nova Zelandia apoia umanitaria no ekipamentu protesaun pesoal ho montante $1.4 milhaun ba governu Timor-Leste, hodi responde ba impaktu inundasaun no luta kombate surtu Covid-19 iha rai laran.

Governu Nova Zelandia apoia umanitaria no ekipamentu protesaun pesoal ho montante $1.4 milhaun ba governu Timor-Leste.

Nia dehan depois akontese inundasaun iha rai laran, numeru kazu detetadu Covid-19 aumenta makas tanba ne’e governu presiza servisu makas hodi responde ba situasaun sira ne’e.

“Ami nia hanoin hamutuk ho povu Timor-Leste, ne’ebe hetan impaktu husi bee sa’e maka’as no rai halai iha momentu ne’ebe nasaun ne’e mos jere kazu Covid-19 foin lalais ne’e,” nia hateten liu husi komunikadu ne’ebe TDW asesu ba.

Nia dehan apoia sira ne’e inklui mos fornesimentu asistensia humanitariu no ekipamentu protesaun pesoal (PPE). Material sira ne’e hanesan sasan ijiene familia nian, sasan ba inan no labarik sira, aimoruk ba halo moos bee, bomba bee, lampada solares. No ekipamentu protesaun pesoal hanesan protetores oin nian, luvas, maskara, oklu protesaun, materiais ba swab, roupa ba mediku sira nian.

Nia hateten sira mos fo kontribuisaun ba programa aihan mundial atu suporta transporta no distribui sasan sokoru ba vitima inundasaun sira iha Dili no munisipio afetado sira.

Iha parte seluk, Diretor Ezekutivu Servisu Autonomia Medikamentu no Ekipamentu Saúde (SAMES), Santana Martins hateten dezastre naturais ne’ebe akontese iha loron 4 fulan Abril ne’e fo impaktu bo’ot tebes tanba ekipamentu protesaun pesoal, ekipamentu mediku no medikamentu balun hetan estragus.

“Ekipamentu protesaun pesoal iha armajen central ne’ebe dadaun ne’e limitado ou menus maka isolation gaun ou roupa ne’ebe maluk sira uza iha sala izolamentu tanba ita hare numeru kazu aumenta makas entau gastus mos makas tebes. Governu halo ona prosesu akizasaun, maibe problema atu lori mai rai laran ne’e difisil tanba ne’e ho apoia sira ne’e ita jere ho diak hodi distribui ba fasilidade izolamentu sira,” nia hateten.

Nia dehan relatorio preleminario ne’ebe iha hatudu katak, produtu farmasiotika hanesan luvas, masker no seluk tan, no produtu mediku liu-liu makina monitor ba pasiente, monitor ba oksigenu, ventilador balun hetan estragus husi inundasaun ne’ebe akontese iha loron 4 fulan Abril liu ba. Alende ne’e vasina ba rotavirus ne’ebe governu sosa iha tinan kotuk barak maka a’at tanba eletrisidade mate no jerador ne’ebe iha bee tama labele funsiona.

Nia haktuir montante husi estragus sira ne’e hotu kuaze besik $1 milhaun tanba monitor pasiente nian tolu maka identifika a’at total no sei iha 10 ne’ebe halo hela verifikasaun inklui mos ventilador balun.

Tuir observasaun TDW iha terenu hare katak, apoia umanitaria no ekipamentu protesaun pesoal sira ne’e tula husi aviaun New Zealand Royal Air Force nian, ne’ebe to’o iha Aeroportu Internasional Presidente Nicolau Lobato.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04