Sexta, Abril 16, 2021
Total visitors: 558227

Iha ambitu lansamentu kampania nasional vasinasaun Covid-19, Primeiru Ministru, Taur Matan Ruak informa katak governu halo ona pedidu oficial ba Primeiru Ministru Australia no China atu apoia governu kompleta tan vasina 80%, tanba faze primeiru hetan ona apoia husi COVAX facility ho kuantidade 20%.

Iha ambitu lansamentu kampania nasional vasinasaun Covid-19, Primeiru Ministru, Taur Matan Ruak informa katak governu halo ona pedidu oficial ba Primeiru Ministru Australia no China atu apoia governu kompleta tan vasina 80%.

Nia dehan laiha ema ida sei livre enkuantu ema hotu-hotu seidauk livre husi Covid-19 tanba presiza vasina atu to’o iha fin do ano 2021, sidadaun hotu-hotu bele hetan ona vasina Covid-19.

“Hau halo pedidu oficial ida ba Primeiru Ministru Australia atu apoia Timor-Leste iha vasina 80% ne’e, no hau mos halo pedidu ida ba Primeiru Ministru China atu apoia Timor iha dezafiu ida ne’e. Alende ne’e governu iha orsamentu ratifikativu tau $35 milhoens ba vasina,” nia hateten bainhira partisipa iha serimonia lansamentu kampania vasinasaun Covid-19 iha edifisio Servisu Saúde Munisipio Dili, iha Formosa, Dili.

Iha oportunidade ne’e nia husu komisaun interministerial Covid-19 atu servisu makas liu tan ho parseiru sira hanesan Organizasaun Mundial Saúde (OMS), UNICEF no seluk tan atu bele asesu ba vasina hodi atinji metas to’o fin do ano 2021, ema hotu hetan ona vasina.

Nia hateten hahu fulan Dezembru 2020, mai numeru kazu aumenta signifikante tebes tanba kontribui makas husi fator ida evolusaun kazu sa’e makas iha nasaun vizinho Indonesia, liu-liu NTT, no fator seluk maka pasajen illegal iha fronteira ne’ebe lori moras ne’e tama mai rai laran to’o akontese transmisaun lokal.

Nia hatutan ho akontesementu dezastre naturais iha loron 4 fulan Abril ne’e, iha posibilidade bo’ot atu akontese transmisaun komunitaria, no situasaun ida ne’e akontese maka sei fo presaun makas ba liña frente sira.

Nia informa ohin loron 7 fulan Abril tinan 2021, Timor-Leste hakat taan pasu positivu ida atu luta kontra surtu Covid-19 liu husi implementasaun vasina Covid-19 iha teritorio tomak, no husu sidadaun hotu atu hola parte iha atividade ida ne’e tanba vasina uniku asaun prevensaun ne’ebe efetivu liu.

Entretantu, Embaixador Australia iha Timor-Leste, Peter Roberts hateten sira pronto ajuda Timor-Leste atu asegura vasina 80% tanba sira iha orsamentu ne’ebe apropriado ba servisu parseria ba asuntu vasina Covid-19.

“Australia nia orsamentu atu suporta Timor-Leste iha vasina hamutuk $24 milhaun durante tinan rua, entaun Australia pronto servisu hamutuk ho governu, OMS no UNICEF asegura vasina, no suporta prosesu distribuisaun, edukasaun tanba importante ema hotu tenke fiar vasina ne’e seguru no efetivu,” nia hateten.

Iha parte seluk, kordenador residensia ONU iha Timor-Leste, Roy Trivedy hateten sira pronto atu ajuda governu hodi atinji metas to’o 2021, ema hotu hetan ona vasina Covid-19.

“Finansiamentu governu atu hare ba 80% ne’e, maibe governu Australia no nasaun seluk pronto ajuda, no ami prontu. Iha parseria COVAX inklui nasaun seluk entau kualker nasaun bele ajuda Timor-Leste,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04