Horta Husu Komunidade Lalika Tauk Simu Vasina Covid-19

Laureado Nobel da Paz, José Ramos Horta husu komunidade sira lalika tauk simu vasina AstraZeneca, ne’ebe governu introdus atu prevene no proteje sidadaun sira husi Covid-19 tanba iha nasaun Inglaterra ema 30 milhoens resin inklui Timoroan sira balun simu ona vasina ne’e, no laiha problema.

“Hau koalia ho ema barak iha mundu, ema sira koalia ingles no Timoroan balun kona ba vasina ne’e. Sira barak maka simu ona vasina ba dose segundu no sira hateten normal hela, klaru dala ruma hetan isin manas no isin moras, maibe ne’e normal vasina sempre iha reasaun tanba ne’e husu populasaun sira wainhira governu hahu vasina ita buka hotu-hotu simu,” nia hateten hafoin simu vasina dose primeiru iha edifisiu servisu saúde munisipio Dili iha Formosa, Dili.

Nia dehan vasina deit la sufisiente atu proteje aan husi Covid-19 tanba ne’e maske hetan ona vasina nafatin disiplina pratika protokolo preventiva sira hanesan uza maskara, fase liman beibeik ho sabaun no bee, halo distansiamentu no evita halibur malu.

Nia hateten ema barak, liu-liu feto sira uza maskara tau fali iha kakorok ne’e lalos tanba virus ne’e ataka liu husi inus, ibun no matan laos kakorok.

Nia hatutan iha social media ema matenek balun hateten Covid-19 bosok, maibe importante atu ema hotu hatene mundu tomak sofre ba surtu ida ne’e tanba ne’e tenke rona maka ema sira ne’ebe responsabilidade iha lideransa no tekniku saúde sira inklui mos Organizasaun Mundial Saúde (OMS).

Nia informa, tuir bilhete vasinasaun Covid-19, faze segundu dose sei hetan fali iha loron 8 fulan Junho tinan 2021.

Iha parte seluk, Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Doutor Rui Maria de Araújo hato’o sentimentu previlejiu tanba tama iha grupo primeiru hamutuk ho membru governu sira simu vasina Covid-19 iha loron lansamentu.

“Hau previlejiu ida simu uluk, maibe hakarak hato’o mos ba populasaun sira labele tauk tanba vasina ne’e seguru. Liu husi vasina ne’e ita bele reforsa isin atu reziste kontra karik ita hetan infesaun husi virus ne’e,” nia hateten hafoin simu vasina.

Nia dehan dezastre naturais ne’ebe akontese iha loron 4 fulan Abril, la ajuda esforsu tomak atu halo prevensaun no mitigasaun ba Covid-19 tanba situasuan ne’e halo ema barak lakon hela fatin no sasan sira inklui aihan.

Nia hatutan hafoin akontese inundasaun iha kapital Dili, sira orienta ona ekipa vijilansia atu halo teste swab ba komunidade sira ne’ebe evakua ba iha sentru evakuasaun atu bele prevene transmisaun.

Tuir dadus iha loron 6 Abril tinan 2021, numeru kazu ativu halo tratamentu iha sala izolamentu hamutuk nain 485, maioria detetadu iha Dili inklui mos munisipio seluk hanesan Baucau, Viquque, Lautem, Liquiça, Ermera, Covalima no RAEOA.