Governu Reativa Operasaun Lojas Kontrusaun

Ministru Prezidensial Konsellu Ministrus Fidelis Magalhães hateten liu husi enkontru konselho ministrus iha loron 5 fulan Abril tinan 2021, governu deside reativa operasaun lojas konstrusaun sira atu sidadaun sira bele ihaasesu ba material sira hodi halo rehabilitasaun ba sira nia hela fatin hafoin hetan estragus husi inundasaun.

“Governu mos ohin hola desizaun ida katak ba loja sira faan material konstrusaun bele loke fila fali atu komunidade sire sosa material sira hodi halo servisu iha sira nia uma,” nia hateten liu husi konferensia imprensa.

Nia dehan ba restorante sira no fatin sira ne’ebe faan hahan tasak bele hahu servisu hikas fali atu autoridade sira bele iha asesu ba hahan manas sira hodi fornese ba sidasaun sira ne’ebe dadaun ne’e hela iha sentru evakuasaun tanba wainhira akontese inundasaun iha loron 4 fulan Abril liu ba difisil atu asesu ba aihan hodi fornese ba sidadaun sira.

Iha oportunidade ne’e, nia mos husu setor privado sira ne’ebe iha makina bo’ot sira kontaktu ho governu hodi mobiliza servisu normaliza infrastruktura sira ne’ebe hetan estragus husi inundasaun.

Iha parte seluk, komunidade Manuel Soares hateten nesesario tebes loja sira faan sasan konstrusaun ne’e halao hikas sira nia atendimentu tanba dezastre naturais ne’ebe akontese iha semana kotuk estraga komunidade sira nia hela fatin no sasan barak.

“Hau hanoin loja sira ne’e nafatin loke no halao atendimentu, importante maka nafatin kumpri protokolu prevensaun Covid-19 hanesan prepara bee no sabaun,” nia hateten.

Nia dehan inundasaun ne’ebe akontese iha kapital Dili, afeta tebes komunidade sira nia moris tanba lakon hela fatin, sasan no balun lakon vida.