Sexta, Abril 16, 2021
Total visitors: 558227

Presidente Cruz Vermelha de Timor-Leste (CVTL), Madalena Hanjan hateten ema barak sei tauk simu vasina Covid-19 tanba ne’e profesionais saúde sira tenke fo informasaun ne’ebe klaru ba komunidade sira kona ba vasina AstraZeneca ne’ebe introdus iha rai laran ba prevensaun Covid-19.

Presidente Cruz Vermelha de Timor-Leste (CVTL), Madalena Hanjan hateten ema barak sei tauk simu vasina Covid-19.

Nia dehan vasina ne’e sona ba ema atu hasa’e imunidade ema nian, maibe tenke halo espliksaun didiak no hare mos estudu sira iha mundu kona ba vasina ne’e salva ona ema barak entau ema sei la tauk atu simu vasina ne’e.

“Ema balun sei tauk katak depois sona vasina ne’e bele hetan fali moras seluk, entau ida ne’e tenke iha sensibilizasaun diak husi sientista, mediku sira atu fo informasaun ne’ebe klaru. Se lae depois sona vasina ema hetan fali moras seluk hanesan pneumonia ruma dehan fali vasina maka halo entau presiza sensibiliza atu hatene molok sona,” nia hateten via telephone.

Nia dehan estado fornese vasina, maibe ema ida-ida maka sei foti desizaun ba sira nia aan rasik atu simu vasina ne’e ou lae.

Nia hatutan CVTL pronto atu ajuda governu halo distribuisaun no mobilizasaun va vasina ne’e atu bele to’o ba ema hotu ne’ebe hakarak hetan vasina.

Nia informa ekipa voluntario CVTL nain 200 maka dadaun ne’e servisu iha liña frente, no voluntario nain 6,000, maibe depende ba individu ida-ida nia desizaun sira aseita bele simu vasina.

Iha parte seluk, Diretora Prestasaun Servisu Saúde, iha Minsiterio da Saúde, Doutora Odete Viegas da Silva hateten vasina Covid-19 ne’e hanesan mos vasina sira seluk ne’ebe halao ba labarik sira durante ne’e katak voluntario la obriga ema hotu tenke hetan vasina.

“Hanesan vasina ne’ebe ita halo ba labarik sira voluntario, ita lahatete ema hotu tenke mai halo vasina. Maibe ita nia advokasia ne’ebe ita fo ba publiku katak vasina ne’e importante husu hotu-hotu tenke mos partisipa iha vasina ne’e tanba se ita hetan vasina ita seguru ba ita nia aan no ba ema seluk,” nia hateten

Nia dehan vasina ho kuantidade 24,000 iha ona rai laran, ne’ebe lansamentu halao iha loron 7 fulan Abril tinan 2021, maibe depende ba ema ida-ida nia hanoin.

Nia hatutan alende pesoal liña frente sira hanesan professional saúde, membru PNTL, F-FDTL, Bombeirus no servisu professional sira seluk, sei fo mos ba sidadaun sira ne’ebe sofre moras kronika hanesan tensaun a’as, kurasaun, diabetiku, fase ran atu bele hasa’e sira nia imunidade.

Nia informa vasina AstraZeneca ne’e hetan ona pre-kualifikasaun bazeia ba rekejitus Organizasaun Mundial Saúde no hetan ona autorizasaun atu sikula iha mundu hodi utiliza ba situasaun emergensia tanba ne’e seguru, kualidade no efetivu ba prevenesaun surtu Covid-19.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04