Sexta, Março 29, 2024
Total visitors: 766366

Diretur Nasional Aprovizionamentu, iha Ministerio da Saúde, Nelson Guterres Castro hateten governu kontratu ona hotel hamutuk 13 iha munisipio Dili no munisipio balun hodi prepara ba fatin kuarentina tanba evolusaun kazu Covid-19 kada loron aumenta beibeik, no ema barak sei presiza halo kuarentina.

Diretur Nasional Aprovizionamentu, iha Ministerio da Saúde, Nelson Guterres Castro hateten governu kontratu ona hotel hamutuk 13 iha munisipio Dili no munisipio balun hodi prepara ba fatin kuarentina tanba evolusaun kazu Covid-19 kada loron aumenta beibeik, no ema barak sei presiza halo kuarentina.

Nia dehan tinan kotuk iha hotel hamutuk 25, depois la rejista kazu extende deit kontratu ho hotel 6, maibe iha fulan Marsu tinan 2021, deteta hikas kazu positivu no kada loron numeru aumenta tanba ne’e kontratu foun tan hotel 7 atu bele akumula sidadaun sira ne’ebe konsidera risku.

“Alojamentu tinan kotuk ita iha 25, depois ita redus tiha ba 6, maibe agora ita hare kazu sa’e tan entau ita husu tan alojamentu 7 atu akomoda ema sira,” nia hateten iha servisu fatin Kaikoli, Dili.

Nia dehan hotel sira ne’e maka hanesan hotel Audian, Mongkoh Laxury, hotel Fortuna, hotel Time Square, hotel Vila Verde, hotel Fantija, Sk. Hotel, YQ Hotel, Leo Kose Hotel, Chonti Hotel, Novo Horizonte no rua seluk tan iha munisipio Covalima.

Nia hateten sira mos halo ona pagamentu parsial ba hotel 25, ne’ebe kontratu iha tinan kotuk, no konsege selu ona ho montante osan $1 milhaun resin sei hela $600,000 resin, maibe iha ona prosesu.

Nia hatutan kustu alojamentu sira lahanesan tanba iha hotel balun ne’ebe iha espasu ne’ebe luan ho fasilidade kompletu no balun ladun kompletu.

Alende ne’e nia dehan, sira mos kontratu kompanhia fornesedor hahan foun hat atu fornese hahan ba sidadaun sira fatin kuarentina sira no profesional saúde sira ne’ebe halao servisu lorloron nian.

Nia haktuir tinan kotuk 2020, kontratu kompanhia fornesedor hahan hamutuk 36, depois la rejistu kazu no numeru konfinamentu redus kontratu deit kompanhia hat.

Nia hatutan sira mos halo ona pagamentu parsial ba kompanhia 36, ne’ebe fornese hahan ba fatin kuarentina no izolamentu, no total ne’ebe selu ona maka $1 milhaun no sei hela $500,000 atu konklui pagamentu ba servisu ne’ebe halao ona iha tinan kotuk.

Nia dehan pagamentu sira ne’e tarde laos tanba servisu lalao, maibe prosesu birokrasia ne’ebe naruk tebes no rekejitus ne’ebe rigorozu, liu-liu dokumentu sira tenke kompletu atu bele halo prosesu ho selu.

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Doutor Rui Maria de Araújo hateten governu liu husi Centru Integradu Gestão Crize ho apoia husi liña ministerio sira halo nafatin preparativu ba senario ne’ebe a’at liu tanba foku transmisaun iha no kazu aumenta kada loron iha munisipi Dili.

Nia dehan numeru kazu sira ne’ebe mosu iha munisipio seluk ne’e sai husi Dili maka ba signifika foku kontaminasaun iha Dili laran tanba ne’e buka tuir nafatin deteta, halo izolamentu, konfinamentu hodi hakotu korentetransmisaun.

“Preparativu ba senario ne’ebe aat liu ita halao hela husi prespetiva oinsa hare fatin izolamentu ba kazu sira ne’ebe asintomatiku, ba kazu lizeiru, moderadu no kazu grave,” nia hateten.

Nia dehan ekipa CIGC, liu-liu destakamentu reasaun rapidu halo servisu intensivamente ho pilar sira iha ministerio da saúde no ministerio seluk hanesan Agensia Dezenvolvimentu Nasional (ADN) no Ministerio Obras Publika (MOP) atu prepara infrastruktura sira hodi bele ajuda responde ba dezafiu karik mosu senario a’at liu iha fulan hira oin mai.