Komunidade Iha Fronteira La Kumpri Regras Prevensaun

Tuir peskija ne’ebe Forum Organizasaun Non Govermentál Timor-Leste (FONGTIL) halo iha munisipiu Bobonaru, Covalima no Oe-cusse hatudu katak maioria komunidade sira ne’eb hela iha fronteira la kumpri regrasprevensaun Covid-19 nian.

Ponto Fokal FONGTIL, Ermenciana Nipu hateten, rezultado peskija ne’ebe sira halo durante lbckdown ba munisipio ne’ebe besik iha fronteira ne’e, realidade hatudu katak komunidade sira la kumpri regras prevensaun.

“Ita hare komunidade sira iha ne’eba halo movimentu livre la uza maskara, la kumpri distansiamentu sosial no loja sira mos la uza be’e sabaun hodi fase liman antes tama no sai,” nia informa.

Nia dehan, komunidade ne’ebe kumpri regras estado emergensia iha fronteira ne’e minoria deit, maibe kumpri mos la maximu.

“Komunidade sira ne’ebe mak kumpri regras ne’e ho razaun katak, sira la iha konhesimentu hodi kumpri nune’e mos sira la iha osan hodi sosa ekipamentu prevensaun hanesan maskara,” nia dehan.

Nia dehan, iha intervista ne’ebe sira halo ho komunidade sira katak, dadaun ne’e komunidade sira la iha osan tanba sira la halo aktividade negosiu no sira la iha rendimentu hodi sosa ekipamentu prevensaun.

Iha parte seluk, Komandante Jeral Polisia Nasional Timor-Leste (PNTL), Komisariu Faustino da Costa hateten, komunidade munisipiu Bobanaro ho Covalima ne’ebe mak la kumpri regras estado emergensia hodi halo prevensaun ba Covid-19 ne’e konsidera infrasaun.

“Tanba ne’e ita husu atu komunidade iha munisipiu rua ne’e tenke kumpri regras bainhira la kumpri ita konsidera halo infrasaun no sei prosesu,” Komisariu Costa dehan.

Tanba ne’e nia apela komunidade sira kumpri regras ne’ebe mak fo sai ona hodi kuntribui ba prevensaun corona virus iha Timor-Leste, tanba atu prevene moras ne’e mai husi ema ida-idak nia liman rasik.

Alende ne’e nia dehan, iha dia 23 fulan Fevereiru ne’e polisia Bobonaru konsege kaptura ona negosiante nain 28 husi munisipiu Lautem ne’ene halo negosiu iha munisipiu Bobonaru.