- Publika iha: 04 Fevereiro 2021
Diretor Executivu Servisu Registu no Verifikasaun Emprezarial (SERVE), Florêncio Sanches informa iha fulan Janeiro tinan 2021, kompanhia internasional 10 resin mak deside taka totalmente atividade tanba laiha aktividade no laiha lukru.
Nia dehan sira halo esforsu atu enkoraja kompanhia sira taka provizorio deit atividade labele taka kompanhia, maibe empreza sira deside taka totalmente kompanhia tanba laiha atividade no rendimentu, liu-liu iha area konstrusaun nian.
“Empreza 10 resin ne’ebe taka iha fulan Janeiru ne’e maioria 90% ema rai liur. Ita komprende sira mai ho rajaun sira labele hela tanba laiha atividade no laiha lukru sira tenke selu uma, ahi no seluk tan,” nia hateten via telefone.
Nia dehan empreza tantu ki’ik no bo’ot ida deit mak taka mos fo impaktu sosial ne’ebe bo’ot tanba trabalhador ida labele fo han familia no oan sira labele ba eskola.
Nia hatutan kompanhia sira ne’ebe deside taka, signifika kompanhia ne’e sei labele moris fali ona. Nia haktuir iha loron ruma nain ba kompanhia ne’e hakarak halo moris fali kompanhia tenke ho entidade foun.
Nia informa iha tinan kotuk 2020, sira konsege registu empreza foun hamutuk 4,100 resin, maibe iha mos kompanhia 100 mak taka iha rai laran tanba laiha lukru.
Tuir baze dadaus SERVE nian hahu tinan 2013 to’o 2020, total empreza tantu nasional no internasional ne’ebe registradu hamutuk 31,500. Husi total empreza ne’ebe registradu 40% deit mak ativu selu taxa ba kofre estado.
Iha parte seluk, Membru Parlamentu Nasional, Deputado Mariano Asanami Sabino husu governu atu aselera pagamentu ba kompanhia sira ne’ebe konklui ona obra tanba kompanhia barak seidauk hetan pagamentu.
Nia dehan projeitu konstrusaun estrada barak mak kompanhia sira halo hotu ona, maibe governu seidauk selu tanba ne’e kompanhia mos la selu trabalhador sira.
“Ita tenke halo medidas ida urgente no lalais, estrada ne’ebe ita uza tiha ona tenke aselera selu atu sira mos selu fali trabalhador sira. Lae kompanhia sira deve ho lukru bo’ot afeta ba kompanhia sira taka,” nia hateten.
Nia hateten koalia kona ba rekuperasaun ekonomia tenke konsidera problema sira ne’e hodi halo intervensaun atu asegura kompanhia sira moris nafatin no trabalhador sira mos iha rendimentu atu sustenta moris lorloron.