Quarta, Janeiro 27, 2021
Total visitors: 544951

Vice Presidente Parlamentu Nasional, Deputado Luis Roberto lamenta kompanhia balun distribui fali produtu aihan ne’ebe estragadu hanesan dois, fuhuk, ba komunidade sira, no husu governu atu kontrola kuantidade no kualidade produtu alimentar ne’ebe fahe ba povu sira.

Vice Presidente Parlamentu Nasional, Deputado Luis Roberto lamenta kompanhia balun distribui fali produtu aihan ne’ebe estragadu.

“Ita hare ba kuantidade ne’ebe atu distribui ba ita nia populasaun sira ho montante $25 dolar, maibe ita hare lato’o. Kuantidade lato’o ona no kualidade produtu mos laiha, ne’e signifika saida,” nia hateten iha plenaria parlamentu nasional.

Nia husu ba governu atu hare fila fali programa distribuisaun aihan ba populasaun, liu-liu hadia jestaun no distribui aihan ne’ebe serve duni ba ema atu konsumu tanba povu iha direitu atu hetan tratamentu ne’ebe dignu husi governu.

Entretantu, Deputada Isabel Ximenes konsidera problema distribuisaun aihan ba populasaun ne’e seriu governu tenke toma medida lalais tanba hahan ne’ebe laiha kualidade bele prejudika ema nia saúde.

“Mantolun ne’e buat ida ne’ebe esensial tebes, maibe kuandu kondisaun a’at ona ema han laos atu ajuda alimenta ita, maibe fo fali moras ba ita tanba ne’e husu ministerio kordena ho empreza ne’ebe halo distribuisaun atu subtitui ho hahan seluk,” nia hateten.

Iha parte seluk, Diretór Operasaun iha Autoridade Inspesaun no Feskalizasaun Atividade Ekonomia, Sanitaria no Alimentar (AIFAESA), Gabriel da Costa hateten sira seidauk simu keixa husi populasaun sira kona ba kualidade produtu mantolun, maibe ekipa halo ona investigasaun.

“Ami seidauk simu keixa husi ita nia komunidade sira kona ba kualidade produtu aihan ligadu ho programa sesta bazika, maibe ami hare iha sosial media entaun ami ba buka tuir kedas halo investigasaun hodi hare. Ami identifika produtu kondisaun a’at ami husu kompanhia substitui kedas, se la substitui ita prosesu tuir dekretu lei no 23/2009 artigu 13 sei hetan sansaun koimas minimu $1,000 no maximu $10,000,” nia hateten.

Nia rekonhese, iha inisio kuantidade produtu la to’o, maibe depois AIFAESA halo intervensaun produtu sira ne’e tetu kilo no tau kedas presu atu komunidade sira bele hatene tuir produtu ne’ebe sira hetan koresponde ba montante osan ne’ebe iha kada ema ida $25 dolar.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04