- Publika iha: 03 Setembro 2011
Sekretariu Estadu Formasaun Profesional e Empregu (SEFOPE), Bendito Freitas hateten alende Governu, setor privadu mós iha papel importante no determinasaun atu fo formasaun ba joventude sira ne’ebé seidauk hetan servisu.
“Ita hatene katak la’os setor publiku mesak de’it mak iha responsabilidade ba formasaun profesional maibé mós setor privadu hanesan parte relijioza nian papel determinante desde uluk to’o agora,” hateten SE. Bendito Freitas semana kotuk hafoin asina akordu ho parseiru Sentru Formasaun Tekniku Don Bosco Comoro, iha Comoro,Dili.
Tuir nia, asina akordu ida ne’e hanesan faze kontinuasaun ne’ebé halo ona iha fulan rua liu ba ho parseiru sira hodi kontinua fo formasaun professional teknika ba joventude sira.
“Ida ne’e mak objetivu asina atu bele kesi hanesan fundamentu ida ba servisu hamutuk ho parseiru setor privadu,“ nia hateten.
Iha mós asina akoordu ne’ebé SEFOPE halo ho Sentru Fomasaun Tekniku Don Bosco Comoro, Madre Salesiana, Eskola Óspitalidade no Turismu husi Venilale, KSTL no Timor Telekom (TT).
Entretantu reprezentante husi Sentru Formasaun Don Bosco Comoro, Pe.Joao Guteres hato’o parabens ba SEFOPE tanba prontu nafatin fo ajuda ba sira hodi eduka joventude sira sai professional.
“Iha ne’e treinamentu konaba Eletrisidade,Karpintaria,soldadura,otomotif ho Komputer,” Pe.Joao informa.
Tuir nia, formandus sira alende mane, iha mós feto sirae total formandus ne’ebé oras ne’e tuir foormasaun hamutuk na’in 160.
“Sira sei tuir estajiu hahu iha Outubru to’o Novembru e iha ne’e durante fulan rua nia laran,” nia informa.
Iha fatin hanesan Manuel Carceres da Costa, Diretór Timor Telecom, hateten asina akordu ho SEFOPE ne’e da balarua nian ho TT.
“Semana kotuk asina tiha memorandu de intendimentu atu fasilita internet ba ita nia joven sira iha area rurais ne’e,” nia dehan.
Manuel sublina katak, sigunda asina akordu ne’e Timor Telekom hanesan emprejariu timor oan nian nebe mak tinan-tinan simu estudante estajiariu universidade iha Timor no mós estudante timor oan estuda iha rai liur hodi estajiu iha TT.
“Ohin asina tan akordu ne’e atu fo dinamismu fo tan motivasaun I loke tan odamatan para depois husi SEFOPE identifika jovens iha area potensiais liu-liu area IT nian bele haruka ba iha ne’eba hodi tuir estajiu atu manan esperiensia,” nia afirma.