- Publika iha: 03 Setembro 2011
Atividade fase kareta ne’ebé bai-bain hala’o husi labarik minoridade sira iha area Kaikoli nian fo impaktu ba estrada tanba bee ne’ebé uza fase nalihun fali iha estrada no hamohu alkatraun.
Preokupasaun ne’e hato’o husi membru Parlamentu Nasionál (PN) Deputadu Alberto da Crus, estrada iha parte Polisia Guarda Nasionál Republika (GNR) nia sorin komesa aat dadaun ona.
“Ha’u dalaruma liu iha ne’eba, labarik barak mak fase kareta e bee ne’e nalihun fali iha estrada, ne’e fo impaktu ba alkatraun sira ne’e e neneik-neneik alkatraun ne’e mohu hotu tanba bee nalihun,”preokupa Deputadu Alberto da Crus semana kotuk iha PN.
Tanba ne’e, Deputadu husi bankada Asosiasaun Sosial Demokrata Timorense (ASDT) ne’e husu ba Governu liu-liu Ministériu kompetentehodi hare ba kestaun ne’e nune’e labele prevene estrada sira ne’e.
“Ha’u hanoin Governu presiza halo bee dalan ida nune’e bee bele la’o tuir nia dalan labele nalihun fali iha estrada, tanba parte ida liu husi fase kareta labarik sira ne’e bele hetan netik osan,” nia dehan.
Entretantu tuir Deputadu Domingos da Costa, katak Governu kria ona fatin atu fase kareta nian e lapresiza fase iha estrada. Hanesan iha Comoro, Fatuhada, Balide no Becora “Labele uza fali fatin publiku hodi uza ba fase kareta,”nia dehan.
Alende ne’e, Deputadu ne’e mós preokupa kona-ba labarik sira ne’ebé bai-bain fase ema nia kareta “ita labele uza fali labarik kiik oan sira, ne’e taka dalan ba sira nia estudu,”.
Pedro Ximenes,12, Kaikoli, ne’ebé bai-bain fase kareta iha edifisiu GNR nia sorin, hateten durante nia fase kareta iha ne’e, nunka ema ida mak bandu sira atu labele fase iha ne’e.
“Ami loro loron fase kareta iha ne’e ema la siak ami ida”Pedro dehan.
Tuir nia, rendementu nia hetan husi fase kareta ne’e balun nia uza ba nia nesesidade lor-loron nian no balun fo ba inan-aman. “Loron ida ha’u hetan $6,00,” nia katak.
Entretantu bainihra jornalista koko konfirma asuntu ne’e ba iha Ministériu Infra estrutura, Pedro Lay maibé lakonsege tanba ministru okupadu.