- Publika iha: 30 Julho 2014
Komunidade distritu Covalima lamentavel ho kontruksaun ponte Takonak ne’ebe abandona husi kompania ne’ebe kaer obra ne’e,maske seidauk hotu.
Delfina Amaral Lopes, hateten ponte ne’e iha inisiu diak hela, maibe governu haruka kompania mai sobu tiha atu halo ho emerjensia, maibe agora husik hela deit.
“Ne’e fo difikuldade bo’ot mai ami povu iha ne’e,” Lopes lamenta, iha distritu Covalima.
Nia informa, ponte ne’e halo desde iha tinan kotuk (2013) no kompania abandona obra ne’e kuaze fulan 3 ona, hahu husi fulan Fevereiru-Abril 2014.
Hatan ba kestaun ne’e, Ministeiru Obras Publiku (MOP), Gastao de Sousa, katak projetu ne’e paradu, tanba kompania ne’ebe halo ponte ne’e la halo kontraktu ho governu.
“Rona deit orden trabalhu, sira halo kedas ona obra ne’e, tuir lei ne’e la forte,” Ministru Sousa hateten.
Tanba ne’e, nia tenke hapara lai obra ne’e to’o ekipa MOP tun ba baze halo prosedimentu ne’ebe legal, depois maka kontinua fali.
“Atu nune’e buat hotu bele la’o ho diak” Ministru Obras Publiku ne’e afirma.