- Publika iha: 23 Maio 2014
Programa USAID Foti husi povu Amerika ne’ebe durante ne’e hala’o sira nia misaun hodi promove akuntabilidade no transparansia iha rai laran, hakotu ona sira nia misaun iha Timor-Leste.
Diretor Programa Foti Timor-Leste, Eduardo Flores Tejo, hateten programas ne’ebe sira hala’o durante tinan tolu nia laran mak, hanesan asistensia teknika, treinamentu no akompanhamentu ba instituisaun governu, sosiedade sivil inklui ba media sira iha rai laran.
Aleinde ne’e, nia dehan, sira mos servisu hamutuk ho parseirus local sira hodi dezenvolve ona livru tematiku korrupsaun ne’ebe integra ona iha kurikulum nasional edukasuan nian, hala’o kampanha edukasaun sivika ba komunidade sira inklui mos fornese asesoria teknika hodi dezenvolve legislasaun sira, hanesan lejislasaun Anti –Brankeamentu Kapital no Lei Unidade Informasaun Finanseiru.
Tejo mos husu ba parseirus sira hotu, atu mantein nafatin progresu sira ne’ebe iha ona no haluan esforsu hodi luta kombate korupsaun iha rai laran.
“Hau fiar katak ita nia esforsu hamutuk sira ne’e, kontribui ona hodi estabelese fundasaun baziku balun ba luta kontra korrupsaun iha Timor –Leste agora buat ne’ebe importante ba governu no sosiedade sivil sira mak haluan etapa inisiu sira,” Tejo hateten, iha serimonia enseramentu programa, iha Restaurante Terra Santa, Dili
Entretantu Embaixador Interinu Amerika iha Timor –Leste, Scott Ticknor, kongratula servisu ne’ebe program foti Timor hamutuk ho parseirus sira halao ona hodi promove sistema finanseiru ne’ebe transparante no husu nia kontinuasaun ba futuru hodi luta kombate korupsaun iha Timor –Leste.
Nia hatutan, Estado Unidus da Amerika (EUA) iha komitmentu bo’ot atu akompanha nafatin ba implementasaun husi lei anti brankeamentu capital, lei ba unidade intelijensia finanseira no normal legal sira ne’ebe fo protesaun ba denunsiante sira.
“Ami mos espera atu Timor –Leste bele hamutuk ho nasaun 90 seluk iha mundu ne’ebe iha lei liberdade ba informasaun nian no protesaun ba sidadaun ida nia direitu atu asesu ba informasaun publiku mak fundasaun importante ba boa governasaun, ultima liu, dezenvolvimentu sustentavel,” Dehan Ticknor.
Enkuantu eis Prezidente Komisaun Anti Korupsaun (KAK), Komisariu Aderito Soares, apresia ho apoiu ne’ebe Foti programa iha ba servisu Komisaun Anti Korupsaun tanba KAK mos hahu ho zero apoiu sira ne’e importante no signifikante tebes ba servisu ne’ebe hala’o durante ne’e.
“Sira apoiu hotu iha aspeitu tolu hanesan hasa’e ema nia konsensia, prevensaun no investigasaun mos sira suporta hotu ami servisu hamutuk tinan tolu nia laran ne’e lao kapas,” eis Komisariu KAK ne’e dehan.