- Publika iha: 29 Abril 2014
Sekretaria Estado ba Promsaun Igualidade (SEPI) konvida membru Parlamentu Nasional atu hola parte iha enkontru asembleia Commission On The Status Of Women (CWS) iha Nova Yorke. 
Sekretaria Estadu Idelta Maria Rodrigues, hateten Timor-Leste ratifika ona Konvensaun Eliminasaun Halakon Formas Diskriminasaun hotu kontra Feto (CEDAW), iha obrigasaun atu halo intervensaun iha asembleia ne’e.
Iha esperinsia, iha asembleia tinan hirak liu ba reprezentante Parlamentu husi nasaun seluk iha mundu hola parte hotu, uniku Timor –Leste deit mak seidauk hola parte.
“Hau koalia ona ho UN Women, hau hakarak tinan ida ne’e membru parlamentu sira tenke reprezenta atu hola parte iha asembleia mundial iha Nova Yorke,” SE Rodrigues hateten, iha Dili.
Nia hateten, enkontru ba tinan ida ne’e bad ala- 58 nian ne’ebe sei hahu iha dia 10-14 Marsu, ho topiku “ Obstaklu ba Implementasaun Millennium Developmentu Goals (MDG’s)” no nasaun hotu sei hato’o progresu no dezafius ba asuntu ne’e.
Entretantu, Prezidente Grupu Feto Parlamentar (GMPTL), Deputada Josefa Alvares Preira Soares, hateten sira sei haree, tanba importante mos ba ba sira atu halo intervensaun ruma kona ba esforsu ne’ebe governu halo atu atinji MDG.
Deputada bankada Fretilin ne’e mos konsidera Governu Timor –Leste failha iha implementasaun MDGs, tanba realidade uma lima kada aldeia barak mak abandona.
“Uma lima ne’ebe dehan uma MDG oras ne’e dadaun barak mak abandona tanba laiha kondisaun, mortalidade saude inan ho oan sei as, saude reprodutivu, mal nutrisaun, alunus barak sei tur iha rai laiha kondisaun,” nia dehan.